Осы Келісімді іске асыру мақсатында көліктік (автомобильдік) бақылау органдары: 1) жекелеген хаттамалар жасасады, басқа Тараптың көліктік (автомобильдік) бақылау органдарына өз мемлекеттерінің көліктік (автомобильдік) бақылауды жүзеге асыруға қойылатын талаптарды регламенттейтін нормативтік құқықтық актілерінің ережелерін жеткізеді, бір-біріне көрсетілген актілерге енгізілетін кез келген өзгерістер туралы хабарлайды, сондай-ақ осы Келісімді іске асыру үшін қажетті құжаттардың үлгілерімен алмасады; 2) көліктік (автомобильдік) бақылау нәтижесінде алынған ақпаратпен өзара және ұдайы алмасып отырады. Ақпарат алмасудың нысанын, құрамын және тәртібін Тараптар мемлекеттерінің көліктік (автомобильдік) бақылау органдары айқындайды; 3) бір Тарап мемлекетінің аумағы арқылы басқа Тарап мемлекетінің аумағына транзитпен жүретін көлік құралдары туралы дерекқорды жүргізуді ұйымдастырады және осы дерекқордағы ақпаратпен өзара алмасып отырады. Көліктік (автомобильдік) бақылау нәтижесінде алынған ақпаратпен алмасу электрондық түрде жүзеге асырылады. Тараптар мемлекеттерінің көліктік (автомобильдік) бақылау органдары көліктік (автомобильдік) бақылау нәтижесінде алынған тауарлар тасымалдайтын халықаралық тасымалдаудың көлік құралдары туралы өзге ақпаратты бере алады.