Бап 86 О гражданской защите. Аварияны немесе оқыс оқиғаны тергеп-тексеру нәтижелерін ресімдеу
Тармақ 1. Аварияға тергеп-тексеруді жүргізу қорытындысы бойынша комиссия ол тағайындалған күннен бастап күнтізбелік отыз күннен кешіктірілмейтін мерзімде аварияны тергеп-тексеру актісін жасайды және аварияны тергеп-тексерудің өзге де материалдарын дайындайды.
Тармақ 2. Аварияны тергеп-тексеру актісіне комиссия мүшелері қол қояды.
Тармақ 3. Аварияны тергеп-тексеру актісі және өзге де материалдар комиссияның шешімімен қауіпті өндірістік объектіні пайдаланатын ұйымға қол қою және осы Заңның 87-бабының 4-тармағына сәйкес, сондай-ақ комиссияның барлық мүшелеріне жіберу үшін ұсынылады.
Тармақ 4. Қазақстан Республикасының өнеркәсіптік қауіпсіздік саласындағы мемлекеттік бақылау мен қадағалау жөніндегі бас мемлекеттік инспекторы тергеп-тексеру нәтижелеріне әсер еткен, тергеп-тексеру тәртібін бұзу фактілері немесе комиссияның тұжырымдары мен қорытындысын қате деп есептеуге негіздер анықталған жағдайда, аварияны тергеп-тексеру актісін қайта қарау туралы шешім қабылдауға құқылы.
Тармақ 5. Оқыс оқиғаға тергеп-тексеру жүргізу қорытындысы бойынша комиссия оқыс оқиғаны тергеп-тексеру актісін жасайды.
Тармақ 6. Оқыс оқиғаны тергеп-тексеру актісіне комиссия мүшелері қол қояды.
Тармақ 7. Оқыс оқиғаны тергеп-тексеру актісін және өзге де материалдарды комиссияның шешімімен қауіпті өндірістік объектіні пайдаланатын ұйым осы Заңның 87-бабының 4-тармағына сәйкес, сондай-ақ комиссияның барлық мүшелеріне жібереді.
Тармақ 8. Аварияны немесе оқыс оқиғаны тергеп-тексеру актісінде мыналар көрсетіледі:
1) қауіпті өндірістік объектіні пайдаланатын ұйым туралы мәліметтер (заңды тұлғаның атауы және орналасқан жері, дара кәсіпкердің тегі, аты, әкесінің аты (егер ол жеке басын куәландыратын құжатта көрсетілсе), тұрғылықты жері бойынша тіркелген мекенжайы);
2) қауіпті өндірістік объектінің атауы, оның орналасқан жері;
3) аварияның немесе оқыс оқиғаның себептері мен мән-жайлары;
4) келтірілген зиянның (залалдың) мөлшері;
5) өнеркәсіптік қауіпсіздік талаптарының жол берілген бұзушылықтары;
6) аварияны немесе оқыс оқиғаны және оның салдарын оқшаулау мен жою бойынша қабылданған шаралар;
7) аварияны немесе оқыс оқиғаны тергеп-тексеру нәтижелері бойынша жүргізілуге тиіс іс-шаралар;
8) қауіпті өндірістік объектіні пайдалану кезінде осындай аварияларды немесе оқыс оқиғаларды болғызбау жөніндегі ұсыныстар;
9) комиссияның шешімі бойынша авария немесе оқыс оқиға туралы өзге де мәліметтер.
10) Аварияларды тергеп-тексеру қорытындысы бойынша анықталған бұзушылықтарды жою мерзімдері оларды орындаудың нақты мүмкіндігіне әсер ететін мән-жайлар ескеріле отырып айқындалады.
11) Аварияларды тергеп-тексеру актісінде көзделген мерзімдер өткенге дейін қауіпті өндірістік объектілерді пайдаланатын ұйым өнеркәсіптік қауіпсіздік саласындағы уәкілетті орган ведомствосының аумақтық бөлімшесіне бұзушылықтарды жою фактісін растайтын материалдарды қоса бере отырып, анықталған бұзушылықтардың жойылғаны туралы ақпаратты ұсынады.
12) Белгіленген мерзімде ақпаратты ұсынбау немесе анықталған бұзушылықтарды толық көлемде жоймау осы Заңның 39-2-бабы 7-тармағының 1) тармақшасына сәйкес жоспардан тыс тексеру жүргізуге негіз болып табылады.
Тармақ 9. Қауіпті өндірістік объектілерді пайдаланатын, бұзушылықтарға жол берген ұйымдарға қатысты аварияларға тергеп-тексеру жүргізу қорытындысы бойынша Қазақстан Республикасының әкімшілік құқық бұзушылық туралы заңнамасында көзделген шаралар қабылданады.