Тармақ 1. Ұйымның мақсаттары мен міндеттері: (а) ауыл шаруашылығын, ауылдық жерлерді, азық-түлік қауіпсіздігін тиімді дамытудың және биотехнологияларды дамытудың, сондай-ақ шөлейттенуден, орман алқаптарының азаюынан, топырақтың эрозиясы мен сортаңдануынан туындаған проблемаларды шешудің түрлі аспектілері бойынша мүше мемлекеттерге сарапшылық тәжірибені және техникалық ноу-хауды ұсыну, сондай-ақ орнықты әлеуметтік байланыстарды қамтамасыз ету; (b) мүше мемлекеттермен үйлестіре отырып, қажетті шұғыл және гуманитарлық көмекті айқындау және көрсету мақсатында, оның ішінде азық-түлік қауіпсіздігі қорын құру арқылы мүше мемлекеттердегі өндірістік қауіпсіздік саласындағы ахуалды бағалау және оған мониторинг жүргізу; (с) мүше мемлекеттерде ауыл шаруашылығын дамыту және азық-түлік қауіпсіздігін арттыру мақсатында қаржылай және ауыл шаруашылығы ресурстарын жұмылдыру және басқару; және (d) ортақ ауыл шаруашылығы қағидаттарын, оның ішінде тиісті технологиялармен алмасу және оларды беру арқылы үйлестіру, тұжырымдау және іске асыру болады. 2. Жоғарыда көрсетілген міндеттерге қол жеткізу үшін Ұйым функцияларды атқарады: (а) тамақтануға, өнімдерге және ауыл шаруашылығына қатысты ақпаратты жинау, зерделеу, түсіндіру және тарату; (b) тамақтану, азық-түлік және ауыл шаруашылығы саласында ғылыми, технологиялық, әлеуметтік және экономикалық зерттеулерді жүргізу және оларға жетекшілік ету; (с) ауыл шаруашылығын, биотехнологияларды және өндіріс практикалары модельдерін, оның ішінде суаруды, тұқым өндірісін, пестицидтерді және агрономиялық басқаруды тұрақты дамытуға қатысты ақпаратпен, деректермен, зерделеумен және зерттеулермен алмасу; (d) ауыл шаруашылығы процестерін жаңғыртуға және институционалдық қуаттарды өрістетуге ықпал ету; (е) мүше мемлекеттердің ауыл шаруашылығы мен азық-түлік қауіпсіздігін тұрақты дамыту үшін ресурстарды жұмылдыруға және басқаруға ықпал ету; (f) микро-қаржылық жобалар, қуаттарды кеңейту, халықаралық жобалар және Ислам қаржы өнімдеріне жетілдірілген қолжетімділік арқылы ауыл шаруашылығына және азық-түлік қауіпсіздігіне ИЫҰ ішінде инвестицияларды ынталандыру; (g) тиісті өңірлік және ұлттық жобаларды, халықаралық бағдарламаларды, құқықтық және басқа да нормаларды, сондай-ақ Ұйымның міндеттерін іске асыру үшін азық-түлік қауіпсіздігі саласындағы ережелерді дамыту және іске асыру; (h) ауыл шаруашылығы саласында ортақ қағидаттарды дамыту және жүзеге асыру; (і) ИЫҰ Бас хатшылығынан түскен тиісті сұраулар негізінде гуманитарлық бағдарламаларға қатысу; (j) әрбір мүше мемлекеттің ерекшеліктерін назарға ала отырып, азық-түліктің жетіспеуі, табиғи және техногендік зілзалалар, апаттар, құрғақшылық пен осыған ұқсас мән-жайлар нәтижесінде мүше мемлекеттерде азық-түлікке жедел қажеттілік туындаған жағдайда қажетті көмек көрсету үшін қажетті өңірлік тетіктерді құру; (k) 7-бапқа сәйкес басқа халықаралық және өңірлік ұйымдармен ынтымақтасу; (l) осы қатынаста жоғары деңгейде Ислам Саммиттері, СІМК және Азық-түлік Қауіпсіздігі және Ауыл Шаруашылығын Дамыту мәселелері жөніндегі ИЫҰ-ның министрлерінің министрлік кездесулері шығаратын ИЫҰ қарарлары мен ұсынымдарын орындау; және (m) Ұйымның міндеттерін орындау үшін барлық қажетті және тиісті шараларды қабылдау.