Тармақ 1. Осы Келісімге сәйкес өз міндеттерін орындау үшін шекаралық өкілдер, олардың орынбасарлары, көмекшілері, хатшылары мен сарапшылары ол үшін белгіленген пункттерде немесе келісілген жерлерде мемлекеттік шекарадан өтеді. 2. Шекаралық өкілдер, олардың орынбасарлары және көмекшілері жазбаша өкілеттік ( 1 , 2 қосымшалар ) негізінде мемлекеттік шекарадан өтеді. 3. Хатшылар куәлік (үлгісі - 3-қосымша ) негізінде мемлекеттік шекарадан өтеді. 4. Сарапшылар және бірлесіп жұмыс жасау үшін тартылған басқа да адамдар шекараның екі жағына да өтуге арналған бір жолғы куәліктер ( 4-қосымша ) негізінде мемлекеттік шекарадан өтеді. 5. Мәжілістерде шекаралық өкілдердің уағдаластығы бойынша шекаралық өкілдер көмекшілерінің өкілеттіктеріне, хатшылар мен қызмет көрсетуші персоналдың куәліктеріне қол қою жүзеге асырылады. 6. Осы Келісімнің ережелеріне сәйкес шекарадан өтуге құқық беретін құжаттарын жоғалтқан жағдайда, олардың иелері шұғыл түрде өз мемлекетінің шекаралық өкілдеріне мәлімдеуі тиіс, ол шектес мемлекеттің шекаралық өкіліне болған жағдай туралы хабар береді.