Тараптар бөлу сызығын салу үшін Кронштадт футштогының нөліне қатысты 1977 жылғы Балтық жүйесі биіктіктерінің минус 28 метрлік белгісіне тең Каспий теңізінің орташа көпжылдық деңгейін негізге алды. Бөлу сызығы бұрылыс нүктелерінің координаттары Тараптармен келісілген 1942 жылғы координаттар жүйесіндегі картографиялық материалдар негізінде айқындалған және Бөлу сызығының бұрылыс нүктелері географиялық координаттарының каталогында ( 1-қосымша ) бекітілген. 2001 жылғы 5 шілдедегі Қазақстан Республикасы мен Түрікменстан арасындағы Қазақстан-Түрікменстан мемлекеттік шекарасын делимитациялау және оны демаркациялау процесі туралы шартқа 1-қосымшада көрсетілген № 13 шекаралық нүктесі бөлу сызығының № 1 бастапқы нүктесі болып табылады. Бөлу сызығы осы Келісімге 1-қосымшада көрсетілген бұрылыс нүктелерін жалғайтын геодезиялық сызықтар арқылы өтеді. Бөлу сызығының ақырғы нүктесі жекелеген халықаралық шартпен айқындалатын Қазақстан Республикасы, Түрікменстан және Әзербайжан Республикасы арасындағы Каспий теңізі түбінің учаскелерін бөлетін сызықтардың түйісу нүктесі болып табылады. Бөлу сызығы Тараптар келіскен, Қазақстан Республикасы мен Түрікменстан арасында Каспий теңізі түбінің учаскелері мен жер қойнауын бөлу сызығының схемасына ( 2-қосымша ) түсірілді. Осы Келісімге қосымшалар оның ажырамас бөлігі болып табылады.