Осы Келісімнің мақсаттары үшін мынадай ұғымдар пайдаланылады: 1. «Мемлекеттік шекара», «шекара», «мемлекеттік шекараның сызығы» - бірдей мағынасы бар, Қазақстан Республикасы мен Қытай Халық Республикасының арасындағы құрлық және су аумақтарының бөліну шектерін, сондай-ақ осы сызық бойынша өтетін әуе кеңістігі мен жер қойнауы бөлінуінің тік жазықтық сызығын білдіреді. 2. «Шекараны делимитациялау туралы құжаттар» - мемлекеттік шекара туралы мемлекетаралық келісімдерді, сондай-ақ Қазақстан Республикасы, Қытай Халық Республикасы мен үшінші елдің арасындағы шекараның түйісу нүктесі туралы шарттарды қоса алғанда, Қазақстан Республикасы мен Қытай Халық Республикасының арасындағы шекараны белгілейтін құқықтық құжаттар. 3. «Шекараны демаркациялау туралы құжаттар» - Демаркациялау туралы хаттама, Мемлекеттік шекараның картасы, Шекара белгілерінің хаттамалары, Шекара белгілерінің координаттары мен биіктіктерінің каталогы, Шекара белгісі бағаналарының өзара орналасу схемаларының альбомы, Аралдардың тиесілігі кестесі және оны демаркацияланғаннан кейін қалыптасқан мемлекеттік шекара туралы басқа да құжаттар. 4. «Бірлесіп тексеру құжаттары» - мемлекеттік шекараны бірлесіп тексеру хаттамалары, Мемлекеттік шекараның картасы, Шекара белгілерінің хаттамалары, Шекара белгілерінің координаттары мен биіктіктерінің каталогы, Шекара белгісі бағаналарының өзара орналасу схемаларының альбомы, Аралдардың тиесілігі кестесі және шекараны бірлесіп тексергеннен кейін қалыптасқан және мемлекеттік шекараны демаркациялау туралы құжаттарға қосымшалар болып табылатын басқа да құжаттар. 5. «Шекара белгілері» — сызықта немесе мемлекеттік шекараның екі жағы бойынша орнатылған жергілікті жерде мемлекеттік шекараның сызығынан өтуін көрсететін белгілер. Олардың географиялық координаттары демаркация туралы құжаттарда немесе бірлесіп тексеру құжаттарында айқындалған және тіркелген. Шекара белгілері негізгі және аралық болып бөлінеді. 6. «Шекаралық орман жолдары» - оларды қадағалауды және көршілес шекара белгілері арасында көру мүмкіндігін қамтамасыз ету мақсатында мемлекеттік шекара сызығының екі жағы бойынша белгілі бір ендік шегінде ағаштардан, бұталардан және басқа да өсімдіктерден тазартылған жергілікті жердің жолақтары. 7. «Шекаралық аудан» - мемлекеттік шекараға жақын орналасқан Қазақстан Республикасының аудандары, Қытай Халық Республикасының уездері (қалалары). 8. «Шекара маңындағы халық» - екі мемлекеттің шекара маңындағы аудандарында тұрақты тұратын халық. 9. «Уәкілетті органдар» - құзыретіне осы Келісімге сәйкес мәселелерді шешу кіретін Тараптар мемлекеттерінің ұлттық заңнамаларында белгіленген органдар. 10. «Шекарадағы оқыс оқиғалар» - мемлекеттік шекара режимінің әртүрлі бұзылуларынан көрініс табатын оқиға. 11. «Шекаралық персонал» - Қазақстан Республикасы мен Қытай Халық Республикасы шекаралық ведомстволардың жеке құрамы. 12. «Мемлекеттің шекара өкілдері» - шекарадағы оқыс оқиғалардың алдын алу, реттеу мен мемлекеттік шекара режимін қамтамасыз ету үшін Тараптар мемлекеттерінің ұлттық заңнамаларына сәйкес тағайындалған тұлғалар. 13. «Шекара өкілінің сарапшысы» - Тараптар мемлекеттері шекара өкілдерінің қызметін қамтамасыз ету үшін тартылатын әртүрлі бейіндегі құзыретті мамандар қатарынан тағайындалатын тұлға. 14. «Трансшекаралық сулар» - мемлекеттік шекара сызығын кесіп өтетін немесе мемлекеттік шекара сызығы бойынша орналасқан барлық өзендерді және басқа да су айдындарын білдіреді. 15. «Шекаралық сулар» - трансшекаралық сулардың құрамдас бөлігі болып табылады және мемлекеттік шекара сызығы бойынша орналасқан барлық өзендерді және басқа да су айдындарын білдіреді. 16. «Трансшекаралық құрылыстар» - мемлекеттік шекараны кесіп өтетін темір жолдар, тас жолдар, мұнай-газ құбырлары, электр беру желілері, кабелдер, көпірлер, бөгеттер, шлюздер және басқа да құрылыстар. 17. «Әуе кемесі» - жер бетінен шағылысқан ауамен өзара әрекеттесуден өзгеше ауамен өзара әрекеттесу есебінен атмосферада қалықтайтын ұшу аппараты (ұшақтар, тікұшақтар, дирижабльдер, әуе шарлары және солар сияқты құралдар). 18. «Форс-можорлық жағдаяттар» - болжауға болмайтын, болмай қалмайтын және еңсерілмейтін объективтік жағдаяттар.