Тармақ 1. Мемлекеттік-жекешелік әріптестік шартының елеулі талаптары мыналар болып табылады:
1) жобаның мақсаттары, міндеттері, тікелей және түпкілікті нәтижелері;
2) мемлекеттік-жекешелік әріптестік жобасын іске асыру кезеңі ішінде мемлекеттік-жекешелік әріптестік объектісі және мемлекеттік-жекешелік әріптестік объектісіне мүліктік құқықтар;
3) мемлекеттік-жекешелік әріптестік жобасының инвестициялық және операциялық кезеңдерінің мазмұны мен мерзімдері;
4) мемлекеттік-жекешелік әріптестік жобасын қаржыландыру мөлшерлері, мерзімдері мен шарттары, сондай-ақ инвестициялардың мөлшерлері, мерзімдері мен шарттары;
5) шығындарды өтеу және кірістерді алу көздері, мемлекеттік қолдау шаралары ұсынылған жағдайда олардың түрлері, көлемдері, ұсыну мерзімдері мен шарттары;
6) мемлекеттік-жекешелік әріптестік жобасын іске асыру мерзімі;
7) мемлекеттік-жекешелік әріптестік шартының тараптары арасында тәуекелдерді бөлу;
8) бюджет саясаты жөніндегі орталық уәкілетті орган бекіткен әдістемелік ұсынымдарға сәйкес есептелген жобаның әлеуметтік-экономикалық және қаржылық-экономикалық модельдері.
9) Тараптар барлық елеулі талаптар бойынша келісімге қол жеткізбеген кезде мемлекеттік-жекешелік әріптестік шарты жасалмаған болып есептеледі.
Тармақ 2. Мемлекеттік-жекешелік әріптестік шарты мынадай міндетті талаптарды қамтуға тиіс:
1) мемлекеттік-жекешелік әріптестік шарты тараптарының, тараптардың өкілетті өкілдерінің толық атауы;
2) мемлекеттік-жекешелік әріптестік шарты тараптарының тұрған жері (заңды мекенжайы) және банктік деректемелері;
3) тараптардың мемлекеттік-жекешелік әріптестік жобасының мақсаттарына, оның ішінде инвестициялық және пайдалану кезеңдері шеңберінде қол жеткізуді қамтамасыз ететін, сондай-ақ тәуекелдерді басқару бөлігіндегі құқықтары мен міндеттері;
4) жоба шеңберінде берілетін тауарлардың, жұмыстар мен көрсетілетін қызметтердің түрлеріне, көлеміне, сапасына қойылатын талаптар, оның ішінде сапа индикаторларын және толық пайдалану әзірлігінің өлшемшарттарын бұзғаны үшін ақаулы ұпайлардың есептемесі;
5) мемлекеттік-жекешелік әріптестік жобасы шеңберінде өндірілетін тауарларға, жұмыстар мен көрсетілетін қызметтерге тарифтерді (бағаларды, алымдар мөлшерлемелерін) қалыптастыру және бекіту тәртібі;
6) бюджет саясаты жөніндегі орталық уәкілетті орган айқындайтын тәртіппен енгізілетін, мемлекеттік-жекешелік әріптестік жобасын іске асыру үшін мемлекеттік-жекешелік әріптестік жобасының болжамды инвестициялары құнының оннан бір пайызы мөлшерінде меншікті қаражатын енгізу және қарыз қаражатын тарту бойынша жекеше әріптестің міндеттемелерін қамтамасыз ету;
7) Қазақстан Республикасының заңнамасына сәйкес мемлекеттік-жекешелік әріптестік шарты бойынша дауларды сотқа дейінгі, сотта және (немесе) соттан тыс шешу тәртібі;
8) мемлекеттік-жекешелік әріптестік шарты тараптарының қабылданған міндеттемелерді орындауын бағалау өлшемшарттары, оларды орындамаған немесе тиісінше орындамаған жағдайларда тұрақсыздық айыбын (міндетті түрде құндық мәнде көрсете отырып) төлеу;
9) егер оператор мемлекеттік-жекешелік әріптестік шартының тарапы болып табылмаса, операторды айқындау тәртібі, оператор тартылуға тиіс талаптар, оны тартуға жауапты тарап;
10) қоршаған ортаны қорғау және жұмыстарды жүргізу қауіпсіздігі жөніндегі талаптар;
11) валюталық компонент бойынша қайта қаржыландыру тетігін қоса алғанда, валюталық тәуекелдерді бөлу тәртібі;
12) мемлекеттік-жекешелік әріптестік шарты тараптарының жауапкершілігі;
13) мемлекеттік-жекешелік әріптестік шартын өзгерту және бұзу шарттары, оның ішінде пайда алушылар мен мүдделі тұлғалар үшін теріс салдарды болғызбау немесе барынша азайту жөніндегі іс-шаралар, сондай-ақ мемлекеттік-жекешелік әріптестік шарты мерзімінен бұрын тоқтатылған жағдайда тараптардың шығыстары мен шығындарын өтеу тәртібі;
14) мемлекеттік-жекешелік әріптестік шартын орындаудан біржақты бас тартудың айрықша жағдайлары;
15) мемлекеттік-жекешелік әріптестік шарты бойынша берілетін мүлікті күтіп-ұстау ауыртпалығының, сондай-ақ көрсетілген мүліктің кездейсоқ жойылу немесе кездейсоқ бүліну тәуекелдерінің өту талаптары мен мерзімдері;
16) мемлекеттік-жекешелік әріптестік шартының орындалуын мониторингтеу тәртібі, оның ішінде жекеше әріптестің мониторинг жүргізу үшін ақпарат беру тәртібі.
17) Мемлекеттік-жекешелік әріптестік шартында мемлекеттік-жекешелік әріптестік жобасын іске асырудың өзге де талаптары қамтылуы мүмкін.
Тармақ 3. Институционалдық мемлекеттік-жекешелік әріптестік шартында осы баптың 1 және 2-тармақтарында көзделген талаптардан басқа, мыналар қамтылуға тиіс:
1) мемлекеттік-жекешелік әріптестік компаниясын құру тәртібі мен мерзімдері;
2) мемлекеттік-жекешелік әріптестік компаниясының органдарын қалыптастыру тәртібі;
3) мемлекеттік-жекешелік әріптестік компаниясының жарғылық капиталын қалыптастыру мен толықтыру тәртібі;
4) мемлекеттік-жекешелік әріптестік компаниясының акционерлері (қатысушылары) арасындағы қатынастар;
5) корпоративтік дауларды шешу тәртібі.
6) Мемлекеттік-жекешелік әріптестік компаниясының құрылтай шартын тараптар институционалдық мемлекеттік-жекешелік әріптестік шартының талаптарында жасауға тиіс.
Тармақ 4. Егер Қазақстан Республикасының бейрезиденті жекеше әріптес болып табылса, мемлекеттік-жекешелік әріптестік шарты бойынша қолданылатын құқықты мемлекеттік-жекешелік әріптестік шартының тараптары айқындайды.
Тармақ 5. Мемлекеттік-жекешелік әріптестік шарты қазақ және орыс тілдерінде жасалуға тиіс. Мемлекеттік-жекешелік әріптестік шарты мемлекеттік-жекешелік әріптестік шарты тараптарының келісімі бойынша айқындалған өзге де тілдерде қосымша жасалуы мүмкін.