Бап 35 О государственных закупках

Тармақ 1. Аукцион тәсілімен мемлекеттік сатып алу қорытындылары туралы хаттама біліктілік талаптарына және аукциондық құжаттама талаптарына сәйкес келеді деп танылған әлеуетті өнім берушінің өтінімін қарау аяқталған күні мемлекеттік сатып алу веб-порталында автоматты түрде қалыптастырылады және аукциондық комиссияның барлық мүшесі мен аукционға қатысуға арналған өтінімдерді берген барлық әлеуетті өнім берушіні электрондық пошта арқылы бір мезгілде хабардар ете отырып, онда орналастырылады.

Тармақ 2. Аукцион тәсілімен мемлекеттік сатып алу қорытындылары туралы хаттамада мыналар қамтылуға тиіс:

• 1) осы Заңның 34-бабы 6-тармағы бірінші бөлігінің 1) және 2) тармақшаларына сәйкес аукциондық комиссияның сұрау салулары туралы ақпарат;
• 2) қабылданбау себептерін егжей-тегжейлі сипаттап, оның ішінде біліктілік талаптарына және аукциондық құжаттаманың талаптарына сәйкес келмейтінін растайтын мәліметтер мен құжаттарды көрсете отырып, аукционға қатысуға арналған өтінімдері қабылданбаған әлеуетті өнім берушілер туралы ақпарат;
• 3) мемлекеттік сатып алуды жүзеге асыру қағидаларында айқындалған өзге де мәліметтер.

Тармақ 3. Аукционға қатысушының аукцион тәсілімен мемлекеттік сатып алу қорытындысы туралы хаттамаға осы Заңда белгіленген тәртіппен шағымдануына болады.