Тармақ 1. Транзит туралы өтінішхат сұрау салынатын мемлекеттің тиісті құзыретті органына жоспарланып отырған транзит жүзеге асырылғанға дейін 10 (он) күннен кешіктірілмей, почта немесе ақпарат берудің техникалық құралдары арқылы берілуге және мынадай ақпаратты: 1) егер осындайлар болса, транзит көлігінің түрлері, транзит маршруты, транзит мемлекеттері және түпкілікті межелі мемлекеті туралы; 2) транзитпен жүретін адам туралы мәліметтерді (аты, тегі, бұрынғы тегі, адам қолданатын өзге де аттары, немесе олар танымал болған аттары, бүркеншек аттары, туған күні, жынысы, мүмкіндігінше туған жері, азаматтығы, тілі, жол жүру құжатының түрі мен нөмірі, реадмиссияға жататын адамның 40x60 мм өлшемдегі түрлі-түсті фотосуреті); 3) пайдаланылуы болжанып отырған мемлекеттік шекара арқылы өткізу пунктін, транзитпен жүретін адамды беру уақытын және ықтимал еріп жүруді; 4) сұрау салушы мемлекеттің құзыретті органының осы Келісімнің шарттары орындалғаны туралы өтінішін қамтуға тиіс. 2. Транзит туралы өтінішхаттың нысаны осы Атқару хаттамасының 7-қосымшасында қамтылған. 3. Сұрау салынатын мемлекет транзит туралы өтінішхатты алғаннан кейін кешіктірмей, 10 (он) күннің ішінде немесе сұрау салушы мемлекеттің құзыретті органының уәжді өтініші бойынша жоспарланып отырған транзитті жүзеге асыруға дейін 2 (екі) жұмыс күнінен кешіктірмей, транзитке келісетіні туралы сұрау салушы мемлекеттің құзыретті органдарын жазбаша нысанда хабардар етеді, мемлекеттік шекара арқылы өткізу пункті мен транзитпен жүрген адамды қабылдаудың болжамды уақытын растайды не оларды транзиттен бас тарту туралы хабардар етеді және осындай бас тартудың себептерін көрсетеді. 4. Егер транзит әуе көлігімен жүзеге асырылса, онда реадмиссияға жататын адам және оған еріп жүретін адамдар әуежайлық транзиттік визаларды алу қажеттілігінен босатылады.