Осы Келісімде пайдаланылатын ұғымдар: (а) реадмиссия - осы Келісімнің ережелеріне сәйкес Сұрау салатын мемлекеттің аумағына заңсыз келген, болатын немесе тұрып жатқан адамдарды (Сұрау салынатын мемлекеттің азаматтарын, үшінші мемлекеттердің азаматтарын немесе азаматтығы жоқ адамдарды) Сұрау салатын мемлекеттің құзыретті органының қайтаруын және Сұрау салынатын мемлекеттің құзыретті органының қабылдауын білдіреді; (b) Қазақстан Республикасының азаматы - Қазақстан Республикасының заңнамасына сәйкес оның азаматтығына ие адам; (c) Норвегия Корольдігінің азаматы - Норвегия Корольдігінің заңнамасына сәйкес оның азаматтығына ие адам; (d) үшінші мемлекеттің азаматы - Уағдаласушы тараптар мемлекеттерінің азаматтығынан өзге азаматтығы бар адам; (е) азаматтығы жоқ адам — ешбір азаматтығы жоқ адам; (f) тұруға рұқсат - баспана беру туралы қолдаухатты немесе тұруға рұқсат беру туралы қолдаухатты қарау рәсіміне байланысты Уағдаласушы тараптар мемлекеттерінің аумағында болуға уақытша рұқсаттарды қамтымайтын адамға Уағдаласушы тараптар мемлекеттерінің аумағында тұруға құқық беретін Уағдаласушы тараптардың құзыретті органдары берген кез келген түрдегі ресми рұқсат; (g) виза — әуежайларда берілетін ерекше түрдегі транзиттік визаларды қамтымайтын, Уағдаласушы тараптар мемлекеттерінің аумағына кіру немесе оның аумағы арқылы транзит үшін қажетті Уағдаласушы тараптардың құзыретті органдары берген рұқсат немесе құжат; (h) транзит — Сұрау салатын мемлекеттен баратын мемлекетке өту кезінде үшінші мемлекеттер азаматтарының немесе азаматтығы жоқ адамдардың Сұрау салынатын мемлекеттің аумағы арқылы өтуі; (і) Сұрау салатын мемлекет - осы Келісімнің 5-бабына сәйкес реадмиссия туралы қолдаухат немесе осы Келісімнің 11-бабына сәйкес транзит туралы қолдаухат жіберетін Уағдаласушы тараптардың бірінің мемлекеті; (j) Сұрау салынатын мемлекет - осы Келісімнің 5-бабына сәйкес реадмиссия туралы қолдаухат немесе осы Келісімнің 11-бабына сәйкес транзит туралы қолдаухат жіберілген Уағдаласушы тараптардың бірінің мемлекеті; (k) құзыретті орган Уағдаласушы тараптардың осы Келісімнің 15-бабында көрсетілген, осы Келісімді іске асыру жүктелетін органы; (l) шекаралас аудан - кедендік аймақтарды қоса алғанда, Уағдаласушы тараптардың теңіз порттарының және халықаралық әуежайларының аумақтары.