Тармақ 1. Транзит туралы қолдаухат Сұрау салынатын мемлекеттің құзыретті органдарына жазбаша нысанда ұсынылады және ол мынадай ақпаратты қамтуы тиіс: а) транзит түрі (әуе, құрлық немесе теңіз көлігі), транзит маршруты, транзит мемлекеттері, егер осындайлар болса, және соңғы баратын мемлекет; b) тиісті адам туралы мәліметтер (аты, тегі, бұрынғы тегі, адам қолданатын басқа да аттары, бүркеншік аты, туған күні, мүмкіндігінше туған жері, азаматтығы, тілі, жол жүру құжатының түрі мен нөмірі); с) пайдалануы ықтимал шекараны кесіп өту пункті, адамды беру уақыты және ықтимал ілесіп жүру; d) Сұрау салатын мемлекеттің, оның пікірінше, осы Келісімнің 10-бабының 2-тармағында көзделген шарттардың орындалғаны және оған осы Келісімнің 10-бабының 4-тармағына сәйкес транзитті қабыл алмауға негіз болып табылатын жағдайлар туралы белгісіз екені туралы өтініші. Транзит туралы қолдаухат жасалатын тиісті үлгі нысан осы Келісімге 6-қосымшада қамтылған. 2. Сұрау салынатын мемлекет осындай қолдаухатты алғаннан кейін күнтізбелік он күн ішінде жазбаша нысанда өзінің транзитке келісімі туралы Сұрау салатын мемлекеттің құзыретті органына хабарлайды және шекараны кесіп өту пункті мен транзиттің жоспарланған уақытын растайды немесе транзиттен бас тарту және оның себептері туралы жазбаша нысанда хабарлайды. 3. Егер транзит әуе көлігімен жүзеге асырылса, онда реадмиссияға жататын адам және оған ілесіп жүруі мүмкін адамдар әуежайдағы ерекше түрдегі транзиттік визалар алу қажеттілігінен босатылады. 4. Сұрау салынатын мемлекеттің құзыретті органдары өзара консультациялар өткізу шартымен транзитті жүзеге асыруға, атап айтқанда аталған адамдарды қадағалауға және қажетті мүмкіндіктерді беруге жәрдемдеседі.