Осы баптың 2-тармағын сақтай отырып, осы Келісімнің 2 және 3-баптарында көзделген міндеттемелердің бірінің негізінде реадмиссияға жататын адамды кез келген беру үшін Сұрау салынатын мемлекеттің құзыретті органына реадмиссия туралы қолдаухат жіберу қажет. 2. Егер реадмиссияға жататын адамда жарамды жол жүру құжаты немесе жеке басын куәландыратын құжаты болса, Сұрау салынатын мемлекеттің құзыретті органына реадмиссия туралы қолдаухат немесе жазбаша өтініш білдіру, ал осы адам үшінші мемлекеттің азаматы немесе азаматтығы жоқ адам болып табылған жағдайда, Сұрау салынатын мемлекет берген жарамды виза немесе тұруға рұқсат талап етілмейді. 3. Егер Сұрау салатын мемлекеттің шекаралас ауданында адам мемлекеттік шекараны (теңіз порттары мен әуежайларды қоса алғанда) заңсыз өткеннен кейін 48 сағаттың ішінде осы адам ұсталса, осы баптың 2-тармағына зиян келтірмей, егер ол тікелей Сұрау салынатын мемлекеттің аумағынан өткен болса (жеделдетілген рәсім) Сұрау салатын мемлекет осындай адамның реадмиссиясы туралы қолдаухатты осындай адам ұсталғаннан кейін 2 күн ішінде жібере алады. 4. Реадмиссия туралы қолдаухат мынадай ақпаратты: а) реадмиссияға жататын адам туралы барлық қолда бар мәліметтерді (аты, тегі, туған күні мен жері, жынысы, соңғы тұрғылықты жері), кәмелетке толмаған, үйленбеген балалары және/немесе зайыбы туралы толық ақпаратты; b) мынадай: Сұрау салынатын мемлекеттің азаматтығына тиесілілігі дәлелдемелерінің бар жоғы туралы; немесе үшінші мемлекет азаматтығының реадмиссиясына арналған шарттар туралы; немесе азаматтығы жоқ адамның реадмиссиясына арналған шарттар туралы деректерді қамтуы тиіс. 5. Қажет болған жағдайда реадмиссия туралы қолдаухат сондай-ақ мынадай ақпаратты: а) осы адам осындай өтінішке нақты айтылған келісім берген жағдайда, беруге жататын адам көмекке немесе медициналық күтімге мұқтаж екені туралы куәландыратын арызды; b) беру жағдайында қажет болуы мүмкін қорғаныс және қауіпсіздікті қамтамасыз ету жөніндегі кез келген басқа шаралар туралы мәліметтерді қамтуы тиіс. 6. Реадмиссия туралы өтініш жасалатын үлгі нысан осы Келісімге 5-қосымшада берілген.