Тармақ 1. Еуразиялық экономикалық одақта (бұдан әрі - Одақ) тауарларды Одақтың кедендік шекарасы арқылы өткізу, олардың Одақтың кедендік аумағында немесе оның шегінен тысқары жерлерде болу және пайдаланылу тәртібі мен шарттарын, тауарлардың Одақтың кедендік аумағына әкелінуіне, олардың Одақтың кедендік аумағынан әкетілуіне, тауарлардың уақытша сақталуына, олардың кедендік декларациялануына және шығарылуына байланысты кедендік операциялар, өзге де кедендік операциялар жасау тәртібін, кедендік төлемдерді, арнайы, демпингке қарсы, өтем баждарын төлеу және кедендік бақылау жүргізу тәртібін белгілеуді, сондай-ақ кеден органдары мен Одақтың кедендік аумағында немесе оның шегінен тысқары жерлерде тауарларды иелену, пайдалану және (немесе) оларға билік ету құқықтарын іске асыратын тұлғалардың арасындағы билік қатынастарын регламенттеуді қамтитын бірыңғай кедендік реттеу жүзеге асырылады.
Тармақ 2. Одақта кедендік реттеу, осы Кодексті қоса алғанда, кедендік құқықтық қатынастарды реттейтін халықаралық шарттарға және Одақ құқығын құрайтын актілерге (бұдан әрі - халықаралық шарттар мен кедендік реттеу саласындағы актілер), сондай-ақ 2014 жылғы 29 мамырдағы Еуразиялық экономикалық одақ туралы шартқа (бұдан әрі - Одақ туралы шарт) сәйкес жүзеге асырылады.
Тармақ 3. Одақтағы кедендік реттеу Одақтың кедендік шекарасы арқылы тауарларды өткізу кезінде тұлғалардың тең құқықтылығы, кедендік операцияларды жасаудың анықтығы, айқындығы және дәйектілігі, кедендік реттеу саласындағы халықаралық шарттар мен актілерді әзірлеу мен қолдануда және оларды халықаралық құқық нормаларымен үндестіруде, сондай-ақ кедендік бақылаудың заманауи әдістерін қолдануда және кеден органдарының қызметінде ақпараттық технологияларды барынша пайдалануда жариялық қағидаттарына негізделеді.
Тармақ 4. Осы Кодекс пен кедендік құқықтық қатынастарды реттейтін, Одақтың құқығына кіретін өзге де халықаралық шарттар арасында қайшылықтар туындаған жағдайда осы Кодекстің ережелері қолданылады.
Тармақ 5. Кедендік реттеу саласындағы халықаралық шарттарда және актілерде реттелмеген кедендік құқықтық қатынастар осындай халықаралық шарттарда және актілерде тиісті құқықтық қатынастар реттелгенге дейін Одаққа мүше мемлекеттердің (бұдан әрі - мүше мемлекеттер) кедендік реттеу туралы заңнамасында реттеледі.