Тармақ 1. Тауарлар шығарылғанға дейін кеден органының рұқсатымен электрондық құжат немесе қағаз жеткізгіштегі құжат түрінде берілген декларанттың дәлелді өтініші бойынша кедендік декларацияда мәлімделген мәліметтер, егер декларанттың өтінішін алған кезге қарай кеден органы осы Кодекстің 325-бабына сәйкес құжаттарды және (немесе) мәліметтерді сұратпаған, оны кедендік тексеріп қарауды жүргізу орны мен уақыты туралы хабарламаған, кедендік қарап тексеруді жүргізу туралы шешім қабылдамаған және (немесе) кедендік сараптама жүргізуді тағайындамаған болса, өзгертілуі (толықтырылуы) мүмкін.
Тармақ 2. Егер кедендік бақылау жүргізу кезінде осы Кодекстің 125-бабының 1-тармағының 9-тармақшасының екінші және үшінші абзацтарына сәйкес кедендік реттеу саласындағы халықаралық шарттар мен актілердің бұзылуы анықталған жағдайда, олар жойылған жағдайда тауарлар шығарудан бас тарту үшін негіз болып табылмайтын болса және кеден органы осындай бұзылуларды жою үшін кедендік декларацияда мәлімделген мәліметтерді өзгерту (толықтыру) қажеттігін белгілеген болса, мұндай мәліметтерді осы Кодекстің 119-бабының 3 және 6-тармақтарында белгіленген тауарларды шығару мерзімі шегінде, кеден органының талап етуі бойынша декларант өзгертуі (толықтыруы) тиіс.
Тармақ 3. Тауарлар шығарылғаннан кейін тауарларға арналған декларацияда және қағаз жеткізгіштегі тауарларға арналған декларацияның электрондық түрінде мәлімделген мәліметтерді өзгерту (толықтыру) осы Кодексте көзделген және (немесе) кеден органының шешімі бойынша не кеден органының рұқсатымен Комиссия айқындайтын жағдайларда жүргізіледі.
Тармақ 4. Тауарларға арналған декларацияда мәлімделген және қағаз жеткізгіштегі тауарларға арналған декларацияның электрондық түрінде мәлімделген мәліметтерді өзгерту (толықтыру) үшін, Комиссия айқындайтын, мәліметтер осы кедендік құжат қолданылмай өзгертілуі (толықтырылуы) мүмкін жағдайларды қоспағанда, тауарларға арналған декларацияны түзету қолданылады.
Тармақ 5. Тауарларға арналған декларацияны түзету осындай тауарларға арналған декларацияның ажырамас бөлігі болып табылады.
Тармақ 6. Комиссия тауарлар шығарылғаннан кейін транзиттік декларацияда, жолаушының кедендік декларациясында, көлік құралына арналған декларацияда және электрондық сауда тауарларына арналған декларацияда және қағаз жеткізгіштегі осындай кедендік декларациялардың электрондық түрлерінде мәлімделген мәліметтерге өзгерту (толықтыру) жүргізілетін жағдайларды, сондай-ақ осындай кедендік декларацияларда мәлімделген мәліметтерге өзгертулер (толықтырулар) енгізу мерзімдері мен тәртібін, осындай кедендік декларацияларда мәлімделген мәліметтерді өзгертетін (толықтыратын) кедендік құжаттардың нысандарын, электрондық құжаттар түріндегі осындай кедендік құжаттардың және қағаз жеткізгіштегі осындай кедендік құжаттардың электрондық түрлерінің құрылымы мен форматтарын, сондай-ақ оларды толтыру тәртібін айқындауға құқылы.