Тармақ 1. Тауарларды кедендік транзит кедендік рәсімімен орналастыру кезінде кеден органы кедендік транзит кедендік рәсімімен орналастырылатын тауарлар жеткізілуге тиіс орынды (бұдан әрі - тауарларды жеткізу орны) айқындайды.
Тармақ 2. Тауарларды жеткізу орны, егер осы баптың 3 - 5-тармақтарында өзгеше белгіленбесе, көліктік (тасымалдау) құжаттарында көрсетілген межелі пункт туралы мәліметтердің негізінде айқындалады.
Тармақ 3. Бір мүше мемлекеттің аумағы шегінде тауарларды тасымалдау кезінде жөнелтуші кеден органы мүше мемлекеттің кедендік реттеу туралы заңнамасында белгіленген жағдайларда, көлік (тасымалдау) құжаттарында көрсетілген мәліметтерге қарамастан, тауарларды жеткізу орнын белгілеуге құқылы.
Тармақ 4. Екі және одан да көп мүше мемлекеттердің аумақтары бойынша тауарларды тасу (тасымалдау) кезінде жөнелтуші кеден органы Одақ шеңберіндегі халықаралық шарттарда көзделген және (немесе) Комиссия айқындайтын өзге де жағдайларда көлік (тасымалдау) құжаттарында көрсетілген мәліметтерге қарамастан, тауарларды жеткізу орнын айқындауға құқылы.
Тармақ 5. Одақ мүшелері болып табылмайтын мемлекеттердің аумақтары және (немесе) теңіз арқылы Одақтың бір кедендік аумағынан Одақтың басқа кедендік аумағына тауарларды тасу (тасымалдау) кезінде жөнелтуші кеден органы осы Кодекстің 304-бабының 8 және 9-тармақтарында көзделген және (немесе) Комиссия айқындаған өзге де жағдайларда көлік (тасымалдау) құжаттарында көрсетілген мәліметтерге қарамастан, тауарларды жеткізу орнын айқындауға құқылы.
Тармақ 6. Кедендік бақылау аймағы болып табылатын, екінші немесе үшінші типтегі куәлігі бар, уәкілетті экономикалық оператордың құрылысжайлары, орынжайлары (орынжайлардың бөліктері) және (немесе) ашық алаңқайлары, егер мұндай тауарлар көлік (тасымалдау) құжаттарына сәйкес осындай уәкілетті экономикалық оператордың құрылысжайларына, орынжайларына (орынжайлардың бөліктеріне) және (немесе) ашық алаңқайларына жіберілетін болса, келу орнынан тасымалданатын тауарларды жеткізу орны ретінде белгіленуі мүмкін.
Тармақ 7. Кедендік транзит кедендік рәсіміне сәйкес тауарларды тасу (тасымалдау) кезінде мүше мемлекеттердің көлік саласындағы заңнамасына сәйкес межелі пункт өзгерген жағдайда, тауарларды жеткізу орны кеден органының рұқсатымен өзгертілуі мүмкін.