Бап 193 О ратификации Договора о Таможенном кодексе Евразийского экономического союза. Тауарларды ішкі тұтыну үшін қайта өңдеу шарттары туралы құжат
Тармақ 1. Мүше мемлекеттің уәкілетті органы беретін тауарларды ішкі тұтыну үшін қайта өңдеу шарттары туралы құжатты осы құжат берілетін мүше мемлекеттің аумағындағы кез келген тұлға, оның ішінде тауарларды қайта өңдеу бойынша операцияларды тікелей жасамайтын тұлға ала алады.
Тармақ 2. Тауарларды ішкі тұтыну үшін қайта өңдеу шарттары туралы құжатта:
1) құжатты берген мүше мемлекеттің уәкілетті органы туралы;
2) құжат берілген тұлға туралы;
3) ішкі тұтыну үшін қайта өңдеу бойынша операцияларды тікелей жасайтын тұлға (тұлғалар) туралы;
4) шетелдік тауарлар және оларды қайта өңдеу өнімдері туралы (Сыртқы экономикалық қызметтің тауар номенклатурасына сәйкес атауы, коды, саны және құны). Мүше мемлекеттердің кедендік реттеу туралы заңнамасында Сыртқы экономикалық қызметтің тауар номенклатурасының тауарлық позициясы деңгейінде шетелдік тауарлардың кодын көрсету мүмкіндігі, сондай-ақ тауарларды және оларды қайта өңдеу өнімдерінің құнын көрсетпеу мүмкіндігі көзделуі мүмкін;
5) тауарларды иемдену, пайдалану және (немесе) оларға билік ету құқығын растайтын құжаттар туралы;
6) қайта өңдеу өнімдерінің сандық және (немесе) пайыздық тұрғыдан шығу нормалары туралы;
7) кедендік аумақта қайта өңдеу жөніндегі операциялар және оларды жасау тәсілдері туралы;
8) ішкі тұтыну үшін қайта өңдеу кедендік рәсімімен орналастырылған шетелдік тауарларды қайта өңдеу өнімдерінде сәйкестендіру тәсілдері туралы;
9) қалдықтар мен ұсақ-түйек қалдықтар туралы (Сыртқы экономикалық қызметтің тауар номенклатурасына сәйкес атауы, коды, саны мен құны). Мүше мемлекеттердің кедендік реттеу туралы заңнамасында Сыртқы экономикалық қызметтің тауар номенклатурасының тауарлық позициясы деңгейінде қалдықтар мен ұсақ-түйек қалдықтардың кодын көрсету мүмкіндігі, сондай-ақ осындай қалдықтар мен ұсақ-түйек қалдықтардың құнын көрсетпеу мүмкіндігі көзделуі мүмкін;
10) ішкі тұтыну үшін тауарларды қайта өңдеу мерзімі;
11) қалдықтарды одан әрі коммерциялық пайдалану мүмкіндіктері туралы;
12) тауарларды кедендік аумақта ішкі тұтыну үшін қайта өңдеу кедендік рәсімімен орналастыру және осы кедендік рәсімді аяқтау болжанатын кеден органы (кеден органдары) туралы;
13) қайта өңдеу өнімдері экономикалық тиімді тәсілмен бастапқы жай-күйіне дейін келтіре алмау мүмкіндігі туралы мәліметтер болуға тиіс.
Тармақ 3. Тауарларды ішкі тұтыну үшін қайта өңдеу мерзімі 1 жылдан не Комиссия тауарлардың жекелеген санаттары үшін белгілейтін неғұрлым ұзақ мерзімнен аспауы мүмкін.
Тармақ 4. Тауарларды ішкі тұтыну үшін қайта өңдеу мерзімі:
1) тауарларды қайта өңдеудің өндірістік процесінің ұзақтығын;
2) қайта өңдеу өнімдерін ішкі тұтыну үшін шығару кедендік рәсімімен орналастыру үшін қажетті уақытты қамтиды.
Тармақ 5. Тауарларды ішкі тұтыну үшін қайта өңдеу мерзімі тауарларды ішкі тұтыну үшін қайта өңдеу кедендік рәсімімен орналастырған күннен бастап, ал тауарларды бірнеше партиямен кедендік декларациялау кезінде - ішкі тұтыну үшін қайта өңдеу кедендік рәсімімен орналастырылған тауарлардың бірінші партиясын орналастырған күннен бастап есептеледі.
Тармақ 6. Тауарларды ішкі тұтыну үшін қайта өңдеу мерзімі осы баптың 3-тармағында көрсетілген мерзім шегінде ұзартылуы мүмкін.
Тармақ 7. Мүше мемлекеттердің заңнамасында тауарларды ішкі тұтыну үшін қайта өңдеу шарттары туралы құжатта көрсетілуге тиіс қосымша мәліметтер белгіленуі мүмкін.
Тармақ 8. Тауарларды ішкі тұтыну үшін қайта өңдеудің шарттары туралы құжат нысаны, оны толтыру тәртібі мен осындай құжатты беру тәртібі, оған өзгерістер (толықтырулар) енгізу, сондай-ақ оны қайтарып алу (жою) және (немесе) қалпына келтіру тәртібі мүше мемлекеттің заңнамасында белгіленеді.