Осы Кодекстің 263-бабына сәйкес жеке пайдалануға арналған тауарларды кедендік транзит кедендік рәсімімен орналастыру кезінде жеке пайдалануға арналған тауарларға қатысты кедендік баждар, салықтарды төлеу жөніндегі міндеттерді орындауды қамтамасыз ету осы Кодекстің 146-бабының 4-тармағында көзделген жағдайларда, сондай-ақ мынадай:
- 1) жеке пайдалануға арналған тауарларды Одақтың кедендік аумағына мүше мемлекетке тұрақты қоныс аударған немесе осы мүше мемлекеттің заңнамасына сәйкес мәжбүрлі қоныс аударушы, босқын мәртебесін алған шетелдік жеке тұлғалар, осындай тануды не осындай мәртебені растайтын құжаттарды ұсынуы шартымен әкелген;
- 2) жеке пайдалануға арналған тауарларды Одақтың кедендік аумағына мүше мемлекетке тұрақты қоныс аударуға, осы мүше мемлекеттің заңнамасына сәйкес мәжбүрлі қоныс аударушы, босқын мәртебесін алған шетелдік жеке тұлғалар, осындай ниетін растайтын құжаттарды ұсынуы шартымен әкелген;
- 3) осы Кодекстің 263-бабы 1-тармағының 3-тармақшасында көрсетілген жеке пайдалануға арналған тауарлар Одақтың кедендік аумағына дипломатиялық өкілдік басшылары, мүше мемлекеттің дипломатиялық өкілдіктерінің дипломатиялық және әкімшілік-техникалық персонал мүшелері, консулдық мекеме басшылары және өзге консулдық лауазымды тұлғалар, мүше мемлекеттің консулдық мекемелерінің консулдық қызметкерлері, Одақтың кедендік аумағынан тысқары жерлерде орналасқан халықаралық ұйымдар жанындағы мүше мемлекеттердің өкілдіктері қызметкерлері, олармен бірге тұратын отбасы мүшелері не осындай тұлғалардың атынан және тапсырмасы бойынша әрекет ететін өзге де тұлғалар кедендік баждарды, салықтарды төлеуден босатыла отырып, әкелу шарттарын сақтауды растайтын мүше мемлекеттердің заңнамасына сәйкес берілетін құжаттарды ұсынған кезде әкелінеді. Комиссия көрсетілген тұлғалар кедендік баждар, салықтар төлеуден босатыла отырып, әкелу шарттарын сақтауды растайтын мүше мемлекеттердің заңнамасына сәйкес берілген құжаттардың тізбесін Одақтың ресми сайтына Интернет желісінде орналастыруды және қалыптастыруды қамтамасыз еткен;
- 4) осы Кодекстің 263-бабы 1-тармағының 4-тармақшасында көрсетілген жеке пайдалануға арналған тауарларды Одақтың кедендік аумағына дипломатиялық өкілдік қызметкерлері, консулдық мекеме қызметшілері, халықаралық ұйымдар жанындағы мемлекеттік өкілдіктер персоналдары (қызметкерлері, лауазымды тұлғалары), Одақтың кедендік аумағында орналасқан халықаралық ұйымдар немесе олардың өкілдіктері, өзге ұйымдар немесе олардың өкілдіктері, олармен бірге тұратын отбасы мүшелері, олардың осындай қызметкерлер, қызметшілер, персонал немесе олардың отбасы мүшелері болып табылатынын растаған кезде әкелінетін;
- 5) осы Кодекстің 263-бабы 1-тармағының 5-тармақшасында көрсетілген жеке пайдалануға арналған тауарларды Одақтың кедендік аумағына дипломатиялық өкілдіктің дипломатиялық персонал мүшелері және консулдық мекеменің консулдық лауазымды тұлғалары, олармен бірге тұратын отбасы мүшелері олар осындай тұлғалар немесе олардың отбасы мүшелері болып табылатынын растаған кезде әкелінетін;
- 6) жеке пайдалануға арналған тауарлар кедендік транзит кедендік рәсімімен орналастырылатын, мүше мемлекеттің заңнамасында белгіленген өзге де жағдайларда ұсынылмайды.