Кеден органының лауазымды адамдарының көшпелі кедендік тексеру жүргізу кезінде:
- 1) тексерілетін тұлғадан көшпелі кедендік тексеру жүргізілетін тауарларды ұсынуды талап етуге;
- 2) мүше мемлекеттердің заңнамасында белгіленген тәртіппен түгендеу жүргізуге немесе тауарларға түгендеу жүргізуді талап етуге;
- 3) лауазымды адамдар көшпелі кедендік тексеру жүргізілетіні туралы шешімді (ұйғарымды) және қызметтік куәліктерін ұсынған жағдайда тексерілетін тұлғаның объектілеріне қолжетімділік алуға;
- 4) тауарлардың сынамаларын және (немесе) үлгілерін іріктеп алуға;
- 5) алып қою актісін жасай отырып, тексерілетін тұлғадан құжаттарды не олардың көшірмелерін алып қоюға;
- 6) мүше мемлекеттердің заңнамасында белгіленген тәртіппен көшпелі кедендік тексеру жүргізілетін тауарларды иеліктен айыруға не өзге тәсілмен осы тауарларға билік етуге бағытталған әрекеттердің жолын кесу үшін көшпелі кедендік тексеру жүргізу мерзіміне тауарларға тыйым салуға немесе оларды алып қоюға;
- 7) үй-жайларға, қоймаларға, архивтерге және көшпелі кедендік тексеру жүргізіліп жатқан құжаттардың және тауарлар орналасқан (сақталған) өзге де жерлерге сүргі салуға;
- 8) тексерілетін тұлғаның өкілдерінен жеке басын куәландыратын құжаттарды және (немесе) өкілеттіктерді растайтын құжаттарды ұсынуды талап етуге;
- 9) тексерілетін тұлғаның ақпараттық жүйелерінің базаларына және деректер банкіне өз құзыреті шегінде қолжетімділік алуға;
- 10) тексерілетін тұлғадан тексеруге жататын мәселелер шеңберінде қажетті құжаттарды (олардың көшірмелерін), оның қызметіне және мүлкіне қатысты өзге де ақпаратты, соның ішінде электрондық нысанда талап етуге және алуға құқығы бар. Егер осы құжаттар (олардың көшірмелері) мүше мемлекеттердің заңнамасына сәйкес көшпелі кедендік тексеру жүргізілетін орында болмауға тиіс болса, кеден органының лауазымды адамы оларды ұсыну үшін жеткілікті, бірақ кемінде 3 жұмыс күн болатын мерзімді белгілейді;
- 11) техникалық құралдарды (оның ішінде аудио- және бейне жазбаларды, фототүсірілімді жүзеге асыратын аппаратураны), сондай-ақ тексерілетін тұлға электрондық нысанда ұсынған ақпаратты өңдеуге арналған бағдарламалық өнімдерді пайдалануға;
- 12) мүше мемлекеттердің заңнамасында көзделген өзге де әрекеттерді жүзеге асыруға құқығы бар.