Тармақ 1. Мүше мемлекеттердің мемлекеттік органдары кеден органының сұрау салуы бойынша ұйымдарды және дара кәсіпкерлерді тіркеуге, салықтарды төлеуге және есептеуге қатысты өздерінің иелігіндегі құжаттарды және мәліметтерді, бухгалтерлік есеп және есептілік деректерін және (немесе) құжаттарын, сондай-ақ кедендік тексеруді жүргізу үшін қажетті, оның ішінде коммерциялық, банктік, салықтық және заңмен қорғалатын өзге де құпияны құрайтын өзге де құжаттарды және мәліметтерді мүше мемлекеттердің мемлекеттік, коммерциялық, банктік, салықтық және заңмен қорғалатын өзге де құпияны қорғау туралы заңнамасының талаптарын сақтай отырып ұсынады.
Тармақ 2. Мүше мемлекеттердің банктері, банктік емес кредиттік (кредиттік-қаржы) ұйымдары және банктік операциялардың жекелеген түрлерін жүзеге асыратын ұйымдары кеден органының талабы бойынша мүше мемлекеттердің ұйымдары мен дара кәсіпкерлерінің банк шоттарының бар болуы және нөмірлері туралы құжаттарды және мәліметтерді, сондай-ақ мұндай ұйымдар мен дара кәсіпкерлердің шоттары бойынша ақшалай қаражат қозғалысына қатысты кедендік тексеру жүргізу үшін қажетті, соның ішінде мүше мемлекеттердің заңнамасына сәйкес банктік құпиясы бар құжаттарды және мәліметтерді ұсынады.
Тармақ 3. Тексерілетін тұлғамен кедендік тексеру жүргізілетін тауарлармен мәмілелер (операциялар) бойынша байланысты тұлғалар кеден органының талабы бойынша тексерілетін тұлғамен немесе сол тауарлармен мәмілелерге (операцияларға) қатысы бар үшінші тұлғалармен жүргізілетін операциялар және есептеулер бойынша кедендік тексеруді жүргізу үшін қажетті құжаттардың көшірмелерін және өзге де ақпаратты ұсынуға міндетті.