Тармақ 1. Кеден органдары декларанттан, кеден ісі саласында қызметті жүзеге асыратын тұлғаларды кедендік бақылау жүргізу үшін қажетті құжаттарды және (немесе) мәліметтерді кедендік бақылауды жүргізген кезде сұратуға, ал осы Кодексте белгіленген жағдайларда - талап етуге, сондай-ақ сұрау салынатын (талап етілген) құжаттарды және (немесе) мәліметтерді ұсыну үшін жеткілікті болуға тиіс оларды ұсынудың мерзімін белгілеуге құқылы.
Тармақ 2. Сұрау салынатын (талап етілген) құжаттардың және (немесе) мәліметтердің тізбесін кеден органы мәміле шарттарын, тауар сипатын, оның мақсатын, сондай-ақ өзге де мән-жайларды ескере отырып, тексерілетін құжаттарға және (немесе) мәліметтерге сүйене отырып айқындайды.
Тармақ 3. Кеден органы құжаттарды және (немесе) мәліметтерді ұсыну туралы сұрау салуда (талапта) белгілеген мұндай құжаттарды және (немесе) мәліметтерді ұсыну мерзімі сұрау салу (талап), оның ішінде жоғалтып алған құжаттарды қалпына келтіру үшін жолданған тұлғаның уәждемелі өтінішінің негізінде ұзартылуы мүмкін. Құжаттардың және (немесе) мәліметтерді ұсыну ұзартылатын мерзім сұрау салу жолданған тұлғаның өтініші негізінде айқындалады, бірақ құжаттарды және (немесе) мәліметтерді ұсынудың кеден органы белгілеген мерзімі өткен күннен бастап 2 айдан аспауы тиіс.
Тармақ 4. Кедендік бақылауды кедендік, өзге құжаттарды және (немесе) мәліметтерді тексеру нысанында жүргізген кезде кеден органы осы Кодекстің 326-бабында көзделген құжаттар және (немесе) мәліметтер осы бапқа сәйкес сұратылған жағдайларды қоспағанда, осы Кодекстің 325-бабына сәйкес құжаттарды және (немесе) мәліметтерді сұратады.
Тармақ 5. Кеден органдары сұратқан құжаттар түпнұсқалар немесе олардың көшірмелері, оның ішінде, егер кедендік реттеу саласындағы халықаралық шарттар мен актілерде құжаттардың түпнұсқаларын міндетті түрде ұсыну белгіленбесе, электрондық құжаттардың қағаз көшірмелері түрінде ұсынылады.
Тармақ 6. Декларант, тасымалдаушы, кеден ісі саласында қызметі жүзеге асыратын тұлғалар, және өзге тұлғалар кеден органдарына кедендік бақылау жүргізу үшін қажетті құжаттарды және (немесе) мәліметтерді ауызша, жазбаша және (немесе) электрондық нысандарда ұсынуға міндетті.
Тармақ 7. Кеден органдары мүше мемлекеттердің мемлекеттік органдарынан, сондай-ақ мүше мемлекеттердің өзге ұйымдарынан мүше мемлекеттердің заңнамасына сәйкес кедендік бақылау жүргізу үшін қажетті құжаттарды және (немесе) мәліметтерді сұратуға және алуға құқылы.
Тармақ 8. Кедендік бақылауды жүргізу үшін кеден органдары мүше мемлекеттердің заңнамасына сәйкес банктерден және банктік емес кредиттік (кредиттік-қаржы) ұйымдардан және банктік операциялардың жекелеген түрлерін жүзеге асыратын ұйымдардан жүзеге асырылатын мәмілелер бойынша ақша операциялары туралы құжаттарды және (немесе) мәліметтерді алуға құқылы.