Тармақ 1. Осы тараудың ережелері 1994 жылғы Тарифтер мен сауда жөніндегі бас келісімнің (1994 жылғы ГАТТ) VII бабында және 1994 жылғы Тарифтер мен сауда жөніндегі бас келісімнің VII бабын қолдану жөніндегі келісімнің ортақ қағидаттары мен қағидаларына негізделген.
Тармақ 2. Егер Одақтың кедендік аумағына әкелу кезінде тауарлар Одақтың кедендік шекарасын кесіп өтсе және осындай тауарларға қатысты осы баптың 3-тармағында көрсетілгендерден өзге кедендік рәсім алғашқы рет мәлімделсе, Одақтың кедендік аумағына әкелінетін тауарлардың (бұдан әрі осы тарауда - әкелінетін тауарлар) кедендік құны осы тарауға сәйкес айқындалады.
Тармақ 3. Осы баптың 2-тармағының ережелеріне қарамастан тауарлардың кедендік құны оларды кедендік транзит кедендік рәсіміне, кедендік қойма кедендік рәсіміне, жою кедендік рәсіміне, мемлекет пайдасына бас тарту кедендік рәсіміне немесе арнайы кедендік рәсіміне орналастырған кезде айқындалмайды.
Тармақ 4. Одақтың кедендік аумағынан әкетілетін тауарлардың кедендік құны кеден органына тауарлардың кедендік декларациялануы жүзеге асырылатын мүше мемлекеттің кедендік реттеу туралы заңнамасына сәйкес айқындалады.
Тармақ 5. Осы Кодекстің 199-бабының 1-тармағында, 209-бабының 1-тармағының екінші абзацында, 2 және 3-тармақтарында және 217-бабының 1-тармағының екінші абзацында, 2 және 3-тармақтарында көрсетілген тауарлардың, сондай-ақ осы Кодекстің 170 , 195 және 250-баптарына сәйкес кедендік рәсімдерге орналастырылуға жататын қалдықтардың құны, Комиссия айқындайтын ерекшеліктері ескеріле отырып, осы тарауға сәйкес айқындалады.
Тармақ 6. Осы Кодекстің 56-бабына және 72-бабының 5-тармағына, 137-бабының 11-тармағына, 198-бабының 12-тармағына сәйкес төленуге жататын кедендік баждарды, салықтарды, арнайы, антидемпингке қарсы, өтем баждарын есептеу мақсаты үшін тауарлардың кедендік құны Комиссия айқындайтын ерекшеліктер ескеріле отырып, осы тарауға сәйкес айқындалады.
Тармақ 7. Егер, осы Кодекстің 209-бабының 1-тармағының екінші абзацында және 217-бабының 1-тармағының екінші абзацында көрсетілген тауарларды қоспағанда, осы Кодексте көзделген кедендік рәсімдердің біріне орналастырылған тауарлар өзге кедендік рәсімге не осындай кедендік рәсімге орналастырылған жағдайда, мұндай тауарлардың кедендік құны оларды осы баптың 3-тармағында көрсетілгеннен өзге кедендік рәсімге алғаш орналастырылған кезінде айқындалған тауарлардың кедендік құны, ал егер тауарларға декларацияға тауарлардың кедендік құны туралы мәліметтерге қатысты өзгерістер енгізілген болса - осындай өзгерістер енгізген кезде айқындалған тауарлардың кедендік құны болып табылады.
Тармақ 8. Тауарлардың кедендік құны осы Кодекстің 61-бабына және 74-бабының 7-тармағына сәйкес кедендік баждар, салықтар, арнайы, демпингке қарсы, өтем баждары төленуге жататын мүше мемлекеттік валютасында айқындалады.
Тармақ 9. Тауарлардың кедендік құнын айқындау тауарлардың еркін немесе жалған кедендік құнын пайдалануға негізделмеуі тиіс.
Тармақ 10. Тауарлардың кедендік құны және оны айқындауға қатысты мәліметтер дұрыс, саны жағынан айқындалған және құжатпен расталған ақпаратқа негізделуі тиіс.
Тармақ 11. Тауарлардың кедендік құнын анықтау рәсімдері жалпы бірдей қолданылатын болуы, яғни тауарларды беретін көздерге, оның ішінде тауарлардың шығарылған жеріне, түріне, мәмілелер қатысушыларына және басқа да факторларға қарай айырмашылығы болмауға тиіс.
Тармақ 12. Әкелінетін тауарлардың кедендік құнын айқындау рәсімдері демпингке қарсы күресу мақсатында пайдаланылмауы тиіс.
Тармақ 13. Осы тараудың ережелері кеден органдарының тауарлардың кедендік құнын растау үшін табыс етілген кез келген өтініштің, құжаттың немесе декларацияның дұрыстығына немесе дәлділігіне көз жеткізу құқығын шектеу немесе күмән келтіру ретінде қарастырыла алмайды.
Тармақ 14. Тауарлардың кедендік құнын декларант айқындайды, ал осы Кодекстің 52-бабының 2-тармағына сәйкес және 71-бабының 3-тармағы ескеріле отырып, кедендік баждарды, салықтарды, арнайы, демпингке қарсы, өтем баждарын кеден органы есептеген жағдайда, тауарлардың кедендік құнын кеден органы айқындайды.
Тармақ 15. Әкелінетін тауарлардың кедендік құнының негізі барынша мүмкін болатын дәрежеде осы Кодекстің 39-бабында айқындалған мәнінде осы тауарлармен мәмілелер құны болуға тиіс.
Тармақ 16. Егер тауарларды кедендік декларациялау кезінде тауарлар Одақтың кедендік аумағына әкету үшін сатылатын болуына орай мәміленің шарттарына сәйкес тауарларға декларацияны кеден органы тіркеу күніне онымен есеп айырысу үшін қажетті нақты мәліметтер қамтылған құжаттардың болмауына байланысты олардың кедендік құнының шамасын айқындау мүмкін болмаған жағдайда, тауарлардың кедендік құнының нақты шамасын айқындауды кейінге қалдыруға жол беріледі. Бұл жағдайда декларанттың қолда бар құжаттары мен мәліметтері (бұдан әрі осы бапта - тауарлардың кедендік құнының алдын ала шамасы) негізінде тауарлардың кедендік құнын айқындауға және мәлімдеуге, сондай-ақ тауарлардың кедендік құнының мәлімделген алдын ала шамасы негізге алына отырып, кедендік баждарды, салықтарды, арнайы, демпингке қарсы, өтем баждарын төлеуге жол беріледі.
Тармақ 17. Комиссия, 1994 жылғы Тарифтер мен сауда жөніндегі бас келісімнің VII бабының қолданылуы жөніндегі Келісімнің, оған түсіндірме ескертулерді, сондай-ақ Дүниежүзілік сауда ұйымының Кедендік бағалау комитеті және Дүниежүзілік кеден ұйымының Кедендік бағалау жөніндегі техникалық комитеті қабылданған тауарлардың кедендік құны жөніндегі құжаттарды қоса алғанда, тиісті ережелері негізге алына отырып, әкелінетін тауарлардың кедендің құнын айқындау әдістерін қолдану кезінде осы тараудың ережелерін біркелкі қолдануды қамтамасыз етуге бағытталған актілерді қолданады.
Тармақ 18. Осы тараудың ережелері Одақтың кедендік шекарасы арқылы өткізілетін жеке пайдалануға арналған тауарларға, жеке тұлғалар сатып алған электрондық сауда тауарларына қатысты қолданылмайды.
Тармақ 19. Әкелінетін тауарлардың кедендік құнын айқындау әдістерін қолдану мәселелері жөніндегі алдын ала шешімдер, егер бұл мүше мемлекеттердің кедендік реттеу туралы заңнамасында белгіленген жағдайда қабылдануы мүмкін. Мүше мемлекеттің уәкілетті органының әкелінетін тауарлардың кедендік құнын анықтау әдістерін қолдану мәселелері жөніндегі алдын ала шешім беру тәртібі мен шарттары, сондай-ақ осындай алдын ала шешімді қолдану тәртібі мен мерзімдері мүше мемлекеттің кедендік реттеу туралы заңнамасында белгіленеді.