Тармақ 1. Кеден органдары ұстаған және осы Кодекстің 381-бабында көрсетілген тұлғалар осы Кодекстің 380-бабының 1 және 2-тармақтарында көзделген мерзімде сұратпаған тауарлар, егер осы бапта өзгеше белгіленбесе, өткізілуге тиіс.
Тармақ 2. Егер осы баптың 1-тармағында көрсетілген, ұсталған тауарларды өткізуді дайындауға байланысты тасымалдау, қайта тиеу (тиеу, түсіру), сақтау бойынша шығыстар, өзге де шығыстар олардың құнынан жоғары болса, сондай-ақ кеден органы тауарды ұстаған мүше мемлекеттің заңнамасында көзделген басқа да жағдайларда мұндай тауарлар кеден органы тауарды ұстаған мүше мемлекеттің заңнамасына сәйкес пайдаланылуға немесе жойылуға тиіс.
Тармақ 3. Осы баптың 1-тармағында көрсетілген тауарларды өткізу, пайдалану немесе жою, оның ішінде тасымалдауға, қайта тиеуге (тиеуге, түсіруге), сақтауға байланысты шығыстарды, мұндай тауарларды өткізуді дайындауға, өткізуге немесе жоюға байланысты өзге де шығыстарды есептеу осы Кодексте айқындалған ерекшеліктер ескеріле отырып, кеден органы тауарды ұстаған мүше мемлекеттің заңнамасына сәйкес жүзеге асырылады.
Тармақ 4. Осы Кодекстің 380-бабының 1 және 2-тармақтарында көзделген мерзімде декларанттар немесе өзге де тұлғалар сұратпаған, ұсталған тауарларды тасымалдауға, қайта тиеуге (тиеуге, түсіруге), сақтауға байланысты шығыстар, мұндай тауарларды өткізуге дайындауға және өткізуге байланысты өзге де шығыстар кеден органы тауарды ұстаған мүше мемлекеттің заңнамасына сәйкес белгіленген тәртіппен осы Кодекстің 383-бабының 1-тармағы ескеріле отырып, көрсетілген тауарларды өткізуден алынған сомалар есебінен өтеледі.
Тармақ 5. Осы баптың 2-тармағында көрсетілген жағдайларда тауарларды тасымалдауға, қайта тиеуге (тиеуге, түсіруге), сақтауға байланысты шығыстарды, мұндай тауарларды пайдалануға немесе жоюға байланысты өзге де шығыстарды декларант немесе өзге де тұлғалар өтейді. Көрсетілген тұлғалар болмаған кезде және, егер бұл кеден органы тауарды ұстаған мүше мемлекеттің заңнамасында белгіленген болса, өзге жағдайларда көрсетілген шығыстар мұндай мүше мемлекет бюджетінің қаражаты есебінен өтеледі.
Тармақ 6. Ұсталған тауарларды өткізгеннен немесе өзге пайдалану үшін бергеннен кейін, сондай-ақ мұндай тауарларды жою нәтижесінде пайда болған қалдықтар Одақ тауары мәртебесін алады.