Тармақ 1. Мүше мемлекеттердің зияткерлік меншік объектілерінің бірыңғай кедендік тізілімін Комиссия жүргізеді.
Тармақ 2. Мүше мемлекеттердің зияткерлік меншік объектілерінің бірыңғай кедендік тізіліміне құқық иеленушінің немесе оның мүдделерін немесе бірнеше құқық иеленушілердің мүдделерін білдіретін тұлғаның өтініші негізінде әрбір мүше мемлекетте қорғалатын зияткерлік меншік объектілері енгізіледі.
Тармақ 3. Мүше мемлекеттердің зияткерлік меншік объектілерінің бірыңғай кедендік тізіліміне енгізілуі мүмкін зияткерлік меншік объектілеріне авторлық құқық және аралас құқықтар объектілері, тауар белгілері, қызмет көрсету таңбалары және тауарлардың шығарылған жерлерінің атаулары жатады.
Тармақ 4. Одақтың кедендік шекарасы арқылы тауарларды өткізумен байланысты немесе кедендік бақылаудағы тауарлармен өзге де әрекеттер жасалған кезде халықаралық шарттарда және Одақтың құқығын құрайтын актілерде және (немесе) мүше мемлекеттердің заңнамасында көзделген зияткерлік меншік объектілеріне құқықтарының бұзылғаны орын алуы мүмкін деп пайымдауға жеткілікті негіздері бар құқық иеленуші мүше мемлекеттердің зияткерлік меншік объектілерінің бірыңғай кедендік тізіліміне зияткерлік меншік объектісін енгізу туралы өтініш (бұдан әрі осы тарауда - өтініш) беруге құқылы.
Тармақ 5. Өтініш Комиссияға зияткерлік меншік объектілерінің бір түрі бойынша беріледі.
Тармақ 6. Өтінішке әрбір мүше мемлекетте зияткерлік меншік объектілеріне құқығының болуын растайтын құжаттар (куәліктер, шарттар, оның ішінде құқықтарды беру және лицензиялық шарттар, құқық иеленуші не құқық иеленушінің (бірнеше құқық иеленушінің) мүдделерін білдіретін тұлға әрбір мүше мемлекеттің заңнамасына сәйкес зияткерлік меншік объектілеріне өзінің құқығын растауға ұсына алатын басқа да құжаттар), сондай-ақ өтініште көрсетілуге тиіс мәліметтерді растайтын құжаттар қоса беріледі.
Тармақ 7. Егер өтінішті құқық иеленушінің (бірнеше құқық иеленушінің мүдделерін білдіретін тұлға берсе, өтінішке құқық иеленушінің (бірнеше құқық иеленушінің) мұндай тұлғаға берген сенімхаты (сенімхаттары) да қоса беріледі. Сенімхат (сенімхаттар) Одақтың бүкіл аумағында қолданылуға тиіс.
Тармақ 8. Өтініш және оған қоса берілетін құжаттар орыс немесе өзге тілде ұсынылады. Құжаттар өзге тілде ұсынылған жағдайда өтінішке олардың орыс тіліндегі аудармасы қоса беріледі.
Тармақ 9. Өтінішпен бірге құқық иеленушінің (бірнеше құқық иеленушінің) тауарлардың шығарылуын тоқтата тұруға байланысты декларантқа, меншік иесіне, тауарларды алушыға немесе өзге тұлғаларға келтірілуі мүмкін мүліктік зиянның өтелуі туралы міндеттеме ұсынылады.
Тармақ 10. Комиссия өтінішті ресімдеуге және қарауға, ұсынылатын мәліметтер мен құжаттардың құрамына қойылатын талаптарды, өтінішті қарау мерзімі мен тәртібін, сондай-ақ мұндай тізілімге зияткерлік меншік объектілерін енгізу, одан мұндай объектілерді алып тастау, оған өзгерістерді (толықтыруларды) енгізу, зияткерлік меншік объектілеріне құқық иеленушінің құқығын қорғау белгіленген мерзімді ұзарту тәртібін, мүше мемлекеттердің зияткерлік меншік объектілерінің бірыңғай кедендік тізіліміне зияткерлік меншік объектісін енгізу кезінде кеден органдары мен Комиссияның өзара әрекет ету және мұндай тізілімді жүргізу тәртібін қамтитын мүше мемлекеттердің зияткерлік меншік объектілерінің бірыңғай кедендік тізілімін жүргізу регламентін (бұдан әрі осы бапта - регламент) айқындайды.
Тармақ 11. Құқық иеленуші осы баптың 9-тармағында көзделген міндеттемені орындау кепілдігі мақсатында мүше мемлекеттердің зияткерлік меншік объектілерінің бірыңғай кедендік тізіліміне зияткерлік меншік объектілерін енгізу мүмкіндігі туралы хабарлама жолданған күннен бастап 1 ай ішінде барлық мүше мемлекеттерде заңдық күші бар тауарлардың шығарылуын тоқтата тұруға байланысты тұлғаларға мүліктік зиян келтіргені үшін жауапкершілікті сақтандыру шартын (шарттарын) немесе көрсетілген міндеттеменің орындалуын қамтамасыз етілуін растайтын өзге де шартты (шарттарды) Комиссияға ұсынуға міндетті.
Тармақ 12. Осы баптың 11-тармағының бірінші абзацында көзделген шарт (шарттар) ұсынылмаған жағдайда зияткерлік меншік объектілері мүше мемлекеттердің зияткерлік меншік объектілерінің бірыңғай кедендік тізіліміне енгізілмейді, бұл туралы өтініш беруші регламентте көзделген тәртіппен және мерзімде хабардар етіледі.
Тармақ 13. Зияткерлік меншік объектілері мүше мемлекеттердің зияткерлік меншік объектілерінің бірыңғай кедендік тізіліміне енгізілгені үшін төлем алынбайды.
Тармақ 14. Мүше мемлекеттердің зияткерлік меншік объектілерінің бірыңғай кедендік тізілімінде қамтылған мәліметтер Одақтың және кеден органдарының ресми сайттарында, Интернет желісінде орналастырылады.