Тармақ 1. Кеден органдары бақылайтын және осы Кодексте реттелетін, ал осы Кодексте реттелмейтін бөлігінде - мүше мемлекеттердің заңнамасында реттелетін кеден өкілдері, кедендік тасымалдаушылар, уақытша сақтау қоймаларының иелері, кеден қоймаларының иелері, еркін қоймалардың иелері, бажсыз сауда дүкендері иелері және электрондық сауда операторлары ретінде қызметтерді көрсетуге байланысты мүше мемлекеттер тұлғаларының қызметі кеден ісі саласындағы қызмет болып табылады.
Тармақ 2. Кеден ісі саласындағы қызметті мүше мемлекеттердің заңнамасына сәйкес құрылған және кеден органы тиісінше кеден өкілдерінің тізіліміне, кедендік тасымалдаушылар тізіліміне, уақытша сақтау қоймалары иелерінің тізіліміне, кеден қоймалары иелерінің тізіліміне, еркін қоймалардың иелері тізіліміне және бажсыз сауда дүкендері иелерінің тізіліміне, электрондық сауда операторларының тізіліміне енгізілген заңды тұлғалар жүзеге асыруға құқылы (осы тарауда бұдан әрі - кеден ісі саласындағы қызметті жүзеге асыратын тұлғалардың тізілімі).
Тармақ 3. Кеден органының кеден ісі саласындағы қызметті жүзеге асыруға үміткер заңды тұлғаларды кеден ісі саласындағы қызметті жүзеге асыратын тұлғалардың тізіліміне енгізу және мұндай тізілімнен оған енгізілген заңды тұлғаларды алып тастау негіздерінің шарттары кеден ісі саласындағы әрбір қызмет түріне қатысты осы бөлімде айқындалады.
Тармақ 4. Кеден органының кеден ісі саласындағы қызметті жүзеге асыруға үміткер заңды тұлғаларды кеден ісі саласындағы қызметті жүзеге асыратын тұлғалардың тізіліміне енгізу тәртібі, мұндай тізілімдерге өзгерістер енгізу тәртібі, мұндай тізілімнен оған енгізілген заңды тұлғаларды алып тастау тәртібі, сондай-ақ мұндай тұлғалардың қызметін тоқтата тұрудың және қайта жалғастыру негіздері мен тәртібі мүше мемлекеттердің заңнамасында белгіленеді.
Тармақ 5. Кеден ісі саласындағы қызметті жүзеге асыратын тұлғалардың тізіліміне енгізуге үміткер заңды тұлғаларға қатысты енгізу шарттарының сақталуын тексеру кезінде, сондай-ақ кеден ісі саласындағы қызметті жүзеге асыратын тұлғалардың тізіліміне енгізілген заңды тұлғалардың қызметін бақылау кезінде осы Кодекстің VI бөлімінде көзделген кедендік бақылау нысаны және кедендік бақылауды жүргізуді қамтамасыз ететін шаралар қолданылуы мүмкін.