Әкелінетін тауарлар үшін іс жүзінде төленген немесе төленуге жататын бағаға қосымша есептеулер жүзеге асырылған кезде:
- 1) осы баптың 1-тармағының 2-тармақшасының "б" тармақшасында көрсетілген тауарлар құнын бөлу осы құнның бәрін тауарлардың бірінші партиясының кедендік құнына немесе декларант айқындаған декларацияланатын тауарлардың санынан кем болмауға тиіс өзге тауарлар санының кедендік құнына жатқызу жолымен жүргізіледі. Мұндай бөлу декларанттың қолындағы құжаттарға байланысты және жалпыға бірдей қабылданған бухгалтерлік есепке алу қағидаттарына сәйкес нақты жағдайларға қолданылатын ақылға сыйымды әдіспен жүргізілуге тиіс. Бұл ретте көрсетілген тауарлардың құны ретінде, егер сатып алушы тауарларды сатып алушымен өзара байланысты тұлға болып табылмайтын сатушыдан сатып алса, оларды сатып алуға жұмсалған шығыстар, не егер тауарды сатып алушы өндірсе, оларды дайындауға жұмсалған шығыстар танылады. Егер көрсетілген тауарларды бұрын сатып алушы оларды сатып алғанына немесе өндіргеніне қарамастан пайдаланған жағдайда, сатып алудың немесе өндірудің бастапқы бағасы олардың пайдаланылуын ескере отырып, осы тауарлардың құнын алу (айқындау) мақсатында азайтылуға тиіс;
- 2) сатып алушы берген немесе осы баптың 1-тармағының 2-тармақшасының "г" тармақшасында көрсетілген, сатып алушы сатып алған немесе жалға алған тауарлар мен көрсетілетін қызметтерге қатысты қосымша есептеулер осындай тауарлар мен көрсетілетін қызметтерді сатып алуға немесе жалдауға жұмсалған шығыстар бөлігінде жүзеге асырылады. Егер сатып алушы қоғам иелігіндегі, яғни мемлекеттік немесе муниципалдық меншіктегі тауарларды берсе, қосымша есептеулер осындай тауарлардың көшірмелерін aлу құны (шығысылары) бөлігінде жүзеге асырылады.