Бап 409 О ратификации Договора о Таможенном кодексе Евразийского экономического союза. Кедендік тасымалдаушының міндеттері
Кедендік тасымалдаушы:
1) осы Кодекстің 407-бабы 1-тармағы 2 - 4-тармақшаларында, сондай-ақ осы Кодекстің 407-бабы 1-тармағы алтыншы тармақшасына сәйкес мүше мемлекеттердің заңнамасында белгіленген кедендік тасымалдаушылардың тізіліміне енгізу шарттарын сақтауға;
2) кедендік транзиттің кедендік рәсіміне сәйкес тауарларды тасымалдау кезінде осы Кодексте белгіленген шарттарды сақтауға және талаптарды орындауға;
3) кедендік транзиттің кедендік рәсіміне сәйкес тасымалданатын тауарлардың есебін жүргізуге және мүше мемлекеттердің заңнамасына сәйкес кеден органдарына мұндай тауарларды тасымалдау туралы, оның ішінде ақпараттық технологияларды пайдалана отырып, есептілік ұсынуға;
4) мүше мемлекеттердің заңнамасында белгіленген жағдайларды қоспағанда, тауарларды жөнелтушіден, оларды алушыдан немесе экспедитордан алған мемлекеттік, коммерциялық, банктік және заңмен қорғалатын өзге де құпияны құрайтын ақпаратты, сондай-ақ басқа да құпия ақпаратты жария етпеуге, өз мақсаттары үшін пайдаланбауға және өзге тұлғаларға бермеуге;
5) кедендік тасымалдаушылардың тізіліміне енгізген кеден органына кедендік тасымалдаушылардың тізіліміне енгізілген кезде өзі мәлімдеген мәліметтердің өзгергені туралы хабарлауға және мұндай мәліметтер өзгерген күннен бастап немесе өзіне мұндай өзгерістер белгілі болған күннен бастап 5 жұмыс күні ішінде мұндай өзгерістерді растайтын құжаттарды ұсынуға міндетті.