Бап 45 О ратификации Договора о Таможенном кодексе Евразийского экономического союза. Резервтік әдіс (6-әдіс)
Тармақ 1. Егер әкелінетін тауарлардың кедендік құны осы Кодекстің 39 және 41 - 44-баптарына сәйкес анықтала алмайтын жағдайда, мұндай тауарлардың кедендік құны Одақтың кедендік аумағындағы бар мәліметтердің негізінде осы тараудың қағидаттары мен ережелеріне сүйене отырып, айқындалады.
Тармақ 2. Тауарлардың құнын анықтаудың, осы бапқа сәйкес пайдаланылатын әдістері осы Кодекстің 39 және 41 - 44-баптарында көзделген әдістер болып табылады, алайда кедендік құнды айқындау кезінде осы бапқа сәйкес олар қолданылған жағдайда икемділікке жол беріледі. Атап айтқанда, мынаған жол беріледі:
1) бағаланатын тауарлардың кедендік құнын анықтау үшін бағаланатын тауарлар өндірілген елден басқа елде өндірілген бірдей немесе біртекті тауарлармен мәміленің құны негіз болып қабылдануы мүмкін;
2) бірдей немесе біртекті тауарлармен мәміленің құны негізінде бағаланатын тауарлардың кедендік құнын анықтау кезінде осы Кодекстің 41 және 42-баптарына сәйкес белгіленген, бағаланатын тауарлармен бірдей немесе бағаланатын тауарлармен біртекті тауарлар Одақтың кедендік аумағына әкету үшін сатылуға тиіс және Одақтың кедендік аумағына бағаланатын тауарлар әкелінген, бірақ Одақтың кедендік аумағына бағаланатын тауарларды әкелгенге дейін күнтізбелік 90 күннен ерте емес, сол немесе оған сәйкес уақыт кезеңінде әкелінуі тиіс деген талаптан ақылға сыйымды ауытқуға жол беріледі;
3) бағаланатын тауарлардың кедендік құнын анықтау үшін осы Кодекстің 43 және 44-баптарына сәйкес белгіленген, бағаланатын тауармен бірдей немесе бағаланатын тауарлармен біртекті тауарлардың кедендік құны негіз болып қабылдануы мүмкін;
4) осы Кодекстің 43-бабына сәйкес бағаланатын тауарлардың кедендік құнын анықтау кезінде осы Кодекстің 43-бабының 3-тармағында белгіленген мерзімнен ауытқуға жол беріледі.
Тармақ 3. Тауарлардың кедендік құнын анықтаудың бірнеше әдісін қолдану мүмкіндігі болған жағдайда, осы баптың 2-тармағына сәйкес оларды қолданудың дәйектілігін ұстану қажет.
Тармақ 4. Әкелінетін тауарлардың осы бапқа сәйкес айқындалған кедендік құны барынша мүмкін болған дәрежеде бұрын айқындалған кедендік құнға негізделуі тиіс.
Тармақ 5. Әкелінетін тауарлардың кедендік құны осы бапқа сәйкес:
1) Одақтың кедендік аумағында өндірілген тауарлардың Одақтың ішкі нарығындағы бағаларының;
2) кедендік мақсаттар үшін екі баламалы құнның неғұрлым жоғарысын қабылдауды көздейтін жүйенің;
3) әкету елінің ішкі нарығындағы тауарлар бағасының;
4) осы Кодекстің 44-бабына сәйкес бірдей немесе біртекті тауарлар үшін айқындалған есеп айырысу құнына қосылған шығындардан басқа шығындардың;
5) тауарларды әкету елінен Одақ мүшесі болып табылмайтын мемлекеттерге берілетін тауарлар бағасының;
6) тауарлардың ең төменгі кедендік құны;
7) еркін немесе жалған құны негізінде айқандалмауға тиіс.
Тармақ 6. Егер кеден органы әкелінетін тауарлардың кедендік құнын өзінде бар мәліметтер негізінде, осы бапқа сәйкес анықтайтын болса, ол декларантқа осындай мәліметтер көздері туралы, сондай-ақ олардың негізінде жүргізілген есептеулер туралы электрондық немесе жазбаша нысанда хабарлайды.