Тармақ 1. Форс-мажорлық мән-жайлар себебінен шекара белгісін қалпына келтіру немесе бұрынғы орнына қайта орнату мүмкіндігі болмаған жағдайда оны қалпына келтірудің немесе бұрынғы орнына қайта орнатудың мүмкін болмауының себептері көрсетіле отырып, осы Келісімге 2-қосымшаға сәйкес әрқайсысы қазақ, қырғыз және орыс тілдерінде екі данада акт ресімделеді және бұл мәселе осы Келісімнің 47-бабына сәйкес құрылған Мемлекеттік шекара режимі жөніндегі бірлескен Қазақстан-Қырғыз комиссиясының (бұдан әрі - Шекара режимі жөніндегі бірлескен комиссия) қарауына енгізіледі.
Тармақ 2. Шекара режимі жөніндегі бірлескен комиссия шекара белгісін жаңа орынға орнату үшін Тараптар мемлекеттері геодезиялық, жерге орналастыру қызметтерінің сарапшылары мен мамандарынан, басқа да уәкілетті органдарының өкілдерінен бірлескен топ қалыптастырады (бұдан әрі - бірлескен сарапшылар тобы).
Тармақ 3. Шекара белгісін жөндеу, қалпына келтіру, қайта орнату және оның орнын ауыстыру, сондай-ақ оның нысаны, өлшемдері, дайындау материалы және орналасқан жері шекараны шегендеу туралы құжаттардың талаптарына сәйкес келуге тиіс.
Тармақ 4. Тараптардың ешқайсысы мемлекеттік шекара сызығында немесе оның екі жағында шегендеу туралы құжаттарда айтылмаған шекара белгілерін немесе оның басқа да белгілемелерін біржақты тәртіппен орнатпайды.
Тармақ 5. Тараптар өз мемлекеттерінің ұлттық заңнамасына сәйкес шекара белгілерін бүлдірген, олардың орнын ауыстырған немесе оларды жойған жеке және заңды тұлғаларды жауапқа тартады, сондай-ақ бүлінген немесе жойылған шекара белгілерін қалпына келтіруге байланысты шығындарды өтеу тәртібін айқындайды.