Тармақ 1. Осы Келісім шеңберінде алынған ақпарат құпия болып табылады. Тараптар мұндай ақпаратқа үшінші тұлғалардың қол жеткізуін шектейді, сондай-ақ оның бақылаусыз таратылуына жол бермеу жөнінде шаралар қабылдайды.
Тармақ 2. Еуразиялық экономикалық одаққа мүше мемлекеттер мен ҚХР-дың осы Келісім шеңберінде ақпарат алмасуды жүзеге асыруға жауапты уәкілетті органдары осы Келісім шеңберінде алынған ақпаратты тек қана кедендік мақсаттар үшін пайдаланады және олар осындай ақпаратты берген уәкілетті органның жазбаша келісуінсіз әкімшілік және қылмыстық процестерде, сондай-ақ сот талқылауларында дәлелдеме ретінде пайдаланыла алмайды.
Тармақ 3. ҚХР-дың уәкілетті органынан ақпарат алған Еуразиялық экономикалық одаққа мүше мемлекеттердің уәкілетті органдары алынған ақпараттың құпиялылығын қамтамасыз ету үшін шаралар қабылдайды және бұл үшін Еуразиялық экономикалық одаққа мүше мемлекеттердің заңнамасына сәйкес оған ұқсас ақпаратқа қатысты қолданылатын шаралар мен тәсілдерге ұқсас келетін, ақпаратты санкцияланбаған қол жеткізуден қорғау тәсілдерін пайдаланады.
Тармақ 4. Еуразиялық экономикалық комиссия мен ҚХР-дың уәкілетті органы Еуразиялық экономикалық одақтың интеграцияланған ақпараттық жүйесі мен ҚХР-дың уәкілетті органының тиісті ақпараттық жүйелері арасында ақпаратты беру кезінде оның қорғалуын қамтамасыз етеді.