Тармақ 1. Одақтың тауары шығарылған жердің атауын құқықтық қорғау өтінім беру ведомствосының осы Шартқа сәйкес Одақтың тауарлары шығарылған жерлер атауларының бірыңғай тізіліміне оны тіркеуі негізінде барлық мүше мемлекеттің аумақтарында бір мезгілде беріледі.
Тармақ 2. Одақтың тауары шығарылған жердің атауын пайдалану құқығы туралы куәлігі жоқ тұлғалардың Одақтың тауары шығарылған жердің тіркелген атауын пайдалануына, тіпті егер бұл ретте тауардың нақты шығарылған жері немесе атауы аудармада, транслитерацияда және транскрипцияда не "түрі", "тұрпаты", "стилі", "тәсілі", "имитация", "әдісі" сияқты және соған ұқсас сөздермен тіркесе пайдаланылса да, сондай-ақ тұтынушыны тауардың шығарылған жеріне және ерекше қасиеттеріне қатысты жаңылыстыруға алып келетін кез келген тауарлар үшін ұқсас белгілемені пайдалануға жол берілмейді.
Тармақ 3. Одақтың тауары шығарылған жердің атауын құқықтық қорғау тоқтатылған немесе кез келген мүше мемлекеттің заңнамасына сәйкес Одақтың тауары шығарылған жердің атауын құқықтық қорғауды ұсыну жарамсыз деп танылған жағдайда, өтінім беру ведомствосы Одақтың тауарлары шығарылған жерлер атауларының бірыңғай тізіліміне тиісті жазбаны енгізуге міндетті.