Тармақ 1. Бір Тарап мемлекетінің аумағынан шекараны бұзудың белгілері (іздері) немесе бұзушы табылған кезде екінші Тарап мемлекетінің шекара өкілдері (шекара комиссарлары) мен уәкілетті органдары өз мемлекетінің аумағында іздеуді, ұстап алуды және шекара бұзушының жеке басын анықтауды жүзеге асырады, бұл туралы бір-біріне хабарлайды.
Тармақ 2. Шекара бұзушыға қатысты қаруды қолдануға Тараптар мемлекеттерінің заңнамасына сәйкес рұқсат етіледі.
Тармақ 3. Шекара бұзушыны ұстап алған Тарап мемлекетінің шекара өкілдері (шекара комиссарлары) екінші Тарап мемлекетінің шекара өкілдеріне (шекара комиссарларына) жасалған құқық бұзушылықтардың мән-жайлары, ұсталғандарға қатысты қолданылған шаралар мен тергеп-тексеру нәтижелері туралы мәліметтерді хабарлайды, сондай-ақ екінші Тарап мемлекетінің шекара өкілдерінің (шекара комиссарларының) сұрау салуы бойынша қажетті материалдарды ұсынады.
Тармақ 4. Шекара өкілдерінің (шекара комиссарларының) құқық бұзушыларды беруі Тараптар мемлекеттерінің заңнамасына және екі Тарап мемлекеті қатысушылар болып табылатын халықаралық шарттарға сәйкес жүзеге асырылады.
Тармақ 5. Мемлекеттік шекараны бұзғаны үшін ұсталған адамдар, Тарап заңнамасына сәйкес олардың шекараны байқаусыз кесіп өту фактісі (шаруашылық-тұрмыстық мақсаттарда, психикалық ауру, жағымсыз табиғи жағдайлар мен апаттың салдарынан, жергілікті жерде бағдарды жоғалту және т.б.) анықталған жағдайда, сондай-ақ кесіп өту кезінде олар қылмыстық істер жасамаған жағдайда, олар келген мемлекетінің аумағына беріледі.