Тармақ 1. Компанияның әрбір құрылтайшысы Келісім күшіне енген күннен бастап күнтізбелік 30 күннен кешіктірмей, осы Жарғыға қосымшаға сәйкес осы құрылтайшы үшін айқындалған қатысу үлесінің кемінде 25 пайызы мөлшерінде өзінің Компанияның жарғылық капиталына қатысу үлесін бастапқы төлеуді жүзеге асырады.
Тармақ 2. Осы баптың 1-тармағына сәйкес Компанияның жарғылық капиталына қатысу үлесін бастапқы төлеу Келісімге қол қойылған күннен бастап мерзімінен бұрын жүргізілуі мүмкін. Бұл ретте Компанияның жарғылық капиталын қалыптастыру үшін төлем басқарушылар кеңесі айқындайтын кредиттік ұйымның шотына есепке жатқызылады.
Тармақ 3. Компанияның жарғылық капиталына қатысу үлестерінің қалған бөлігін құрылтайшылар жыл сайын, 2 жыл ішінде тең үлестермен. өтейді, олардың біріншісі осы баптың 2-тармағына сәйкес жасалған төлемнен кейін 12 айдан кешіктірілмей төленуге жатады.
Тармақ 4. Компанияның жарғылық капиталына қатысу үлестерін төлеуді Компания құрылтайшылары мерзімінен бұрын жүргізуі мүмкін.
Тармақ 5. Компанияны құрған кезде және оның жарғылық капиталы ұлғайтылған кезде Компанияның жарғылық капиталына қатысу үлесін төлеу номиналды құн бойынша жүзеге асырылады.
Тармақ 6. Қатысу үлесін төлеуді мемлекеттік орган немесе қатысушы мемлекеттің үкіметі уәкілеттік берген ұйым Ресей рублімен жүргізеді.
Тармақ 7. Егер Компанияның құрылтайшысы осы баптың 1 және 3-тармақтарында белгіленген мерзімдер ішінде осы Жарғыға қосымшада көзделгенмен салыстырғанда, жарғылық капиталға өзінің қатысу үлесін аз төлегені туралы мәлімдесе немесе төлесе, басқарушылар кеңесі Компанияның басқа құрылтайшыларына жарғылық капиталға өзінің қатысу үлесін ұлғайту құқығын пайдалануды дереу ұсынуға міндетті. Мұндай құқық көрсетілген ұсыныс алынған күннен бастап 6 ай ішінде іске асырылуға тиіс. Мұндай құқықтан бас тартылған жағдайда, басқарушылар кеңесі көрсетілген үлесті төлеуді қайтадан ұсынуға шешім қабылдайды.
Тармақ 8. Компания құрылтайшыларының үлестерді төлеуінен түскен қаражат басқарушылар кеңесі айқындайтын кредиттік ұйымдағы Компанияның шотына есепке жатқызылады.