Тармақ 1. Сессияның өткізілуіне байланысты Ұйымның билік етуіне ұсынылатын үй-жайларды Ұйым пайдаланатын бүкіл кезең бойы олар Ұйымның үй-жайлары ретінде қаралады, демек Конвенцияның III бабының 5-бөлімінде айтылған қолсұғылмаушылық артықшылықтарын пайдаланады.
Тармақ 2. Ұйымның үй-жайлары Ұйымның бақылауы мен жауапкершілігіне беріледі, оның осы үй-жайларға кез келген тұлғаның кіруіне рұқсат беруге немесе тыйым салуға айрықша құқығы бар және кез келген тұлғаны олардан шығарып жіберу үшін де шаралар қабылдай алады.
Тармақ 3. Қазақстан тарапы бұған рұқсаты жоқ адамдардың немесе адамдар тобының кіруі, тәртіпсіздіктер немесе жақын маңдағы кез келген артық шу Ұйымның үй-жайларындағы жұмысқа кедергі келтірмеуін қамтамасыз ету үшін тиісті шараларды қабылдайды. Осы мақсат үшін Қазақстан тарапы қажет болса, Ұйымның үй-жайларынан тыс құқық қорғау органдарының қызметкерлерін орналастырады және қабылдаушы елдің қолданылатын заңнамасына сәйкес өз қалауы бойынша қажетті болып табылатын кез келген басқа шараларды қабылдайды.
Тармақ 4. Ұйымның өңірлік директорының сұратуы бойынша Қазақстан тарапы құқық қорғау органдары қызметкерлерінің, егер қажеттілік туындаған жағдайда, Ұйымның үй-жайларындағы тәртіпті сақтауға, сондай-ақ Ұйымға кедергі келтіруі мүмкін кез келген тұлғаны шығарып жіберуге және осы үй-жайларда қабылдаушы елдің қолданылатын заңнамасына сәйкес жалпы қауіпсіздікті қамтамасыз етуге көмек көрсете алуы үшін қажетті санын ұсынады.