Тармақ 1. Үкімді орындаушы тарап өзінің ұлттық заңнамасын басшылыққа ала отырып, сотталған адамның жағдайын нашарлатпай, Үкім шығарушы тараптың сот үкімінің орындалуын жалғастыруды толық көлемде қамтамасыз етуге міндетті.
Тармақ 2. Үкімді орындаушы тараптың соты Үкім шығарушы тараптың сот үкімі бойынша тағайындалған дәл сондай бас бостандығынан айыру мерзімін өз Тарапының ұлттық заңнамасы бойынша айқындай отырып, шешім қабылдайды.
Тармақ 3. Егер жасалған қылмыс үшін бас бостандығынан айырудың шекті мерзімі Үкімді орындаушы тараптың ұлттық заңнамасы бойынша Үкім шығарушы тараптың сот үкімі бойынша тағайындалғаннан аз болса, Үкімді орындаушы тараптың соты дәл осындай қылмыс жасағаны үшін өзінің ұлттық заңнамасында көзделген бас бостандығынан айырудың ең жоғары мерзімін айқындайды.
Тармақ 4. Сотталған адамның Үкім шығарушы тараптың аумағында өтеген жазасының бір бөлігі Үкімді орындаушы тарапта жазаны өтеудің жалпы мерзіміне есептеледі.
Тармақ 5. Егер Үкім шығарушы тараптың сот үкімі Үкімді орындаушы тарапта біреуі немесе бірнешеуі қылмыс деп танылмайтын екі немесе одан да көп іс-әрекетке қатысты болса, осы Тараптың соты жазаның қандай бөлігі қылмыс болып табылатын іс-әрекетке қолданылатынын айқындайды.
Тармақ 6. Егер жасалған іс-әрекет үшін осындай жаза осы Тараптың ұлттық заңнамасында көзделген болса, қосымша жазаны орындау туралы шешімді Үкімді орындаушы тараптың соты өзінің ұлттық заңнамасына сәйкес қабылдайды.