Тармақ 1. Бірлескен бақылау іс-шаралары әрбір мүше мемлекеттің уәкілетті органында жыл сайын өткізіледі және барлық мүше мемлекеттер аумағында есепті жылдан кейінгі жылдың 1 қыркүйегінен кешіктірілмей аяқталуға тиіс.
Тармақ 2. Бірлескен бақылау іс-шарасын өткізу үшін бірлескен бақылау іс-шарасын өткізу бағдарламасы (бұдан әрі - бағдарлама) жасалады.
Тармақ 3. Мүше мемлекеттердің уәкілетті органдары бірлескен бақылау тобының мүшелерін тиісті жұмыс жағдайларымен қамтамасыз етеді (уәкілетті органның аумағына кіруді ұйымдастырады, жеке үй-жай, ұйымдастыру техникасын, байланыс қызметтерін ұсынады) және бірлескен бақылау іс-шарасын өткізуге жәрдем көрсетеді.
Тармақ 4. Мүше мемлекеттердің уәкілетті органдары кедендік әкелу баждарының сомаларын есепке жатқызуға және бөлуге, оларды мүше мемлекеттер бюджеттерінің кірісіне аударуға байланысты ақпаратты және құжаттарды бірлескен бақылау тобының мүшелеріне ұсынады.
Тармақ 5. Мемлекеттік немесе заңмен қорғалатын өзге құпияға жатқызылған мәліметтерді қамтитын ақпаратты және құжаттарды қағаз жеткізгіште және (немесе) электронды түрде беру аумағында бірлескен бақылау іс-шарасы өткізілетін мүше мемлекеттің заңнамасына сәйкес жүзеге асырылады.