Тармақ 1. Шартты жасасу және орындау осы Заңға, Қазақстан Республикасының азаматтық заңнамасына, мемлекеттік сатып алуды жүзеге асыру қағидаларына сәйкес жүзеге асырылады.
Тармақ 2. Шарттардың жобалары уәкілетті орган бекітетін үлгілік шарттарға сәйкес жасалады.
Тармақ 3. Шарт бір қаржы жылына арналған мерзімге жасалады.
Тармақ 4. Шарт тапсырыс беруші мен өнім беруші қол қойғаннан кейін күшіне енеді. Егер шарт тіркелуге жататын болса, ол Қазақстан Республикасының заңнамасына сәйкес тіркелгенінен кейін күшіне енеді.
Тармақ 5. Егер жеңімпаз деп танылған әлеуетті өнім беруші мемлекеттік сатып алуды жүзеге асыру қағидаларында белгіленген мерзімдерде тапсырыс берушіге қол қойылған шартты ұсынбаса немесе шартты жасасып, шартты орындауды қамтамасыз етуді және (немесе) демпингке қарсы соманы (бар болса) енгізбесе, онда мұндай әлеуетті өнім беруші шарт жасасудан жалтарған болып танылады.
Тармақ 6. Шарт осы шарт бойынша міндеттемелер орындалған күннен бастап күнтізбелік отыз күннен аспайтын мерзімде тауарларды бергені, жұмыстарды орындағаны не қызметтер көрсеткені үшін толық төлем жасау туралы талаптарды қамтуға тиіс.
Тармақ 7. Шарт тараптарына қатысты шарт бойынша міндеттемелерді орындамағаны не тиісінше орындамағаны үшін жауапкершілік көзделуге тиіс.
Тармақ 8. Өнім беруші жұмыстарды орындау не қызметтерді көрсету үшін қосалқы мердігерлерге (бірлесіп орындаушыларға) беретін жұмыстар мен көрсетілетін қызметтердің шекті көлемдері жиынтығында орындалатын жұмыстардың немесе көрсетілетін қызметтердің жалпы көлемінің отыз пайызынан аспауға тиіс.
Тармақ 9. Тапсырыс беруші мен өнім беруші көрсетілген шарт бойынша қабылданған міндеттемелерді толық орындаған жағдайда шарт орындалды деп есептеледі.
Тармақ 10. Шартты жасасу, оның ішінде шарттың орындалуын қамтамасыз етулерді (авансты қамтамасыз етуді, демпингке қарсы соманы) енгізу тәртібі, олардың түрлері мемлекеттік сатып алуды жүзеге асыру қағидаларында айқындалады.