Тармақ 1. Әдетте, кедендік құн импорт елінде қолжетімді ақпарат негізінде 5-қосымшаға сәйкес айқындалады. Алайда, есептелген құнды айқындау үшін бағаланатын тауарларды өндіру шығыстарын және импорт елінен тысқары жерден алынатын басқа да ақпаратты зерделеу талап етілуі мүмкін. Сонымен қатар, көп жағдайда тауар өндіруші импорт елінің билік органдарының құзырынан тыс болады. Есептік құн әдісін қолдану негізінен сатып алушы мен сатушы өзара байланысты тұлғалар болып табылатын жағдайлармен шектеледі және өндіруші импорт елінің мемлекеттік органдарына өндіріс шығыстарының қажетті калькуляциясын беруге және қажет болуы мүмкін кейінгі тексеруді қамтамасыз етуге дайын болады.
Тармақ 2. 6-баптың 1 (а) тармағында көрсетілген "шығыстар немесе құн" өндіруші ұсынған немесе оның атынан ұсынылған бағаланатын тауарлардың өндірісі туралы ақпарат негізінде айқындалуға тиіс. Мұндай ақпарат, егер осындай шоттар тауарлар өндірілген елде қолданылатын жалпы қабылданған бухгалтерлік есепке алу қағидаттарына сәйкес келген жағдайда, өндірушінің коммерциялық шоттарына негізделуге тиіс.
Тармақ 3. "Шығыстар немесе құн" 8-баптың 1 (а) тармағының "ii" және "iii" тармақшаларында көрсетілген элементтердің құнын қамтиды. Олар 8-баптың 1 (b) тармағында көрсетілген, сатып алушы импортталатын тауарларды өндіруге байланысты пайдалану үшін тікелей немесе жанама түрде жеткізген кез келген элементтің 8-бапқа ескертпелерге сәйкес тиісінше бөлінген құнын да қамтиды. Импорт елінде өндірілген 1 (b) тармақтың "iv" тармақшасында көрсетілген элементтердің құны осындай элементтерді өндіруші төлейтін дәрежеде ғана қосылады. Бұл ретте осы тармақта көрсетілген элементтердің шығыстары да, құны да есептік құнын айқындау кезінде екі рет ескерілмейтінін түсіну керек.
Тармақ 4. 6-баптың 1 (b) тармағында көрсетілген "Пайда мен жалпы шығыстардың сомасы", егер өндірушінің деректері, әдетте, өндіруші импорт еліне экспорттау үшін экспорт елінде өндірген бағаланатын тауарлармен бірдей сыныптағы немесе түрдегі тауарларды сату кезінде алынатын деректермен сәйкес келсе, өндіруші ұсынған немесе оның атынан ұсынылған ақпараттың негізінде айқындалуға тиіс.
Тармақ 5. Осыған байланысты "Пайда мен жалпы шығыстардың сомасы" біртұтас ретінде қарастырылуға тиіс екенін атап өткен жөн. Бұдан жасалатын тұжырым, егер белгілі бір жағдайда өндірушінің пайда көрсеткіштері төмен, ал өндірушінің жалпы шығыстары жоғары болса, онда, тұтас алғанда, өндірушінің пайдасы мен жалпы шығыстары, әдетте, сол сыныптағы немесе түрдегі тауарларды сату кезінде алынатын деректерге сәйкес келуі мүмкін. Мысалы, егер тауар импорт еліне бірінші рет келіп түссе және өндіруші сатудың басталуына байланысты жалпы жоғары шығыстарды жабу үшін нөлдік немесе төмен пайдаға қанағат тұтса, осындай жағдай туындауы мүмкін. Егер өндіруші импорттық тауарларды сатудан түсетін пайданың төмен деңгейі ерекше коммерциялық жағдайлардың салдары екенін растай алатын болса, өндірушінің нақты пайдасы туралы деректер, өндірушінің оларды негіздейтін жақсы коммерциялық негіздері болған және өндірушінің баға саясаты өнеркәсіптің тиісті саласындағы әдеттегі баға саясатын көрсеткен жағдайда, назарға алынуға тиіс. Мұндай жағдай, мысалы, өндірушілер сұраныстың күтпеген төмендеуіне байланысты бағаны уақытша төмендетуге мәжбүр болған кезде немесе импорт елінде өндірілетін тауарлардың ассортиментін толықтыру үшін тауарларды сатқан кезде және бәсекеге қабілеттілікті сақтау үшін төмен пайданы қанағат тұтқан кезде орын алуы мүмкін. Егер өндірушінің пайда мен жалпы шығыстар туралы өз деректері, әдетте, өндірушілер импорт еліне экспорттау үшін экспорттаушы елде өндіретін, бағаланатын тауарлармен бірдей сыныптағы немесе түрдегі тауарларды сату кезінде алынатын деректерге сәйкес келмесе, пайда мен жалпы шығыстардың сомасы тауар өндіруші ұсынған немесе оның атынан ұсынылған ақпараттан ерекшеленетін басқа тиісті ақпаратқа негізделуі мүмкін.
Тармақ 6. Егер есептік құнын айқындау мақсатында өндіруші ұсынған ақпараттан ерекшеленетін басқа ақпарат пайдаланылса, импорт елінің мемлекеттік органдары импорттаушының сұрау салуы бойынша оған 10-баптың ережелерін ескере отырып, осындай ақпарат көзі, пайдаланылған деректер және осындай деректерге негізделген есептеулер туралы хабарлайды.
Тармақ 7. 6-баптың 1 (b) тармағында көрсетілген "жалпы шығыстар" 6-баптың 1 (а) тармағына сәйкес енгізілмеген тауарларды өндіру мен экспортқа сатудың тікелей және жанама шығыстарын қамтиды.
Тармақ 8. Белгілі бір тауарларды басқа да тауарлар сияқты "сол сыныптағы немесе түрдегі" тауарларға жатқызу тиісті мән-жайлар ескеріле отырып, әрбір нақты жағдайда жүзеге асырылуға тиіс. 6-баптың ережелеріне сәйкес әдеттегі пайда мен жалпы шығыстарды айқындау кезінде қажетті ақпарат берілетін бағаланатын тауарларды қамтитын тауарлардың аз ғана тобының немесе қатарының импорт еліне экспортқа сатылуы зерделенуге тиіс. 6-баптың мақсаттары үшін "сол сыныптағы немесе түрдегі тауарлар" бағаланатын тауарлар шығарылған елден болуға тиіс.