"Сатып алғаны үшін сыйақы" деген термин бағаланатын тауарларды сатып алу кезінде импорттаушыны шетелде ұсыну бойынша қызметтер көрсеткені үшін импорттаушының өз өкіліне төлеген сыйақысын білдіреді.
Тармақ 1. Импортталған тауарлар арасында 8-баптың 1 (b) тармағының "ii" тармақшасында көрсетілген элементтердің пропорционалды бөлінуінде рөл атқаратын екі фактор бар: элементтің өзінің құны және осы құнның импортталған тауарларға қатысты бөліну тәсілі. Осы элементтерді пропорционалды бөлу бухгалтерлік есепке алудың мән-жайлары мен жалпы қабылданған қағидаттарына сәйкес ақылға қонымды түрде жүргізілуге тиіс.
Тармақ 2. Элементтің құнына келетін болсақ, егер импорттаушы осы элементті белгілі бір бағамен импорттаушымен өзара байланысты тұлға болып табылмайтын сатушыдан сатып алса, онда элементтің құны осы баға болып табылады. Егер элементті импорттаушы немесе импорттаушымен өзара байланысты тұлға жасаған болса, онда элементтің құны оны өндіруге жұмсалған шығыстар болады. Егер элементті импорттаушы бұрын пайдаланған болса, оны осы импорттаушы сатып алғанына немесе өндіргеніне қарамастан, сатып алудың немесе өндірудің бастапқы бағасы оны пайдалануды ескере отырып, элементтің ағымдағы құнын алу мақсатында төмендету жағына түзетуге жатады.
Тармақ 3. Элементтің құны айқындалған кезде бұл құнды импортталатын тауарлар арасында бөлу қажет. Көрсетілген бөлу әртүрлі тәсілдермен жүзеге асырылуы мүмкін, мысалы, егер импорттаушы барлық құнның баж салығын бірден төлеуге ниет білдірсе, құнды бірінші партияға жатқызуға болады. Тағы бір мысал ретінде: импорттаушы құнды бірінші жөнелтілген кезге дейін өндірілген тауардың бірнеше бірлігіне бөлу жөнінде өтініш білдіруі мүмкін. Сонымен қатар, импорттаушы осы өнімге қатысты келісімшарттар немесе қатаң міндеттемелер болған жағдайда, құнды өндірілуі күтілетін бүкіл өнімдерге бөлу жөнінде өтініш білдіруі мүмкін. Бөлу әдісін таңдау импорттаушы ұсынған құжаттамаға байланысты болады.
Тармақ 4. Жоғарыда айтылғандарға иллюстрация ретінде мынадай мысалды қарастырған жөн: импорттаушы импортталатын тауарлар өндірісінде қолдануға жататын нысанды өндірушіге ұсынады және өндірушімен 10000 бірлік тауар сатып алу туралы келісімшарт жасасады. 1000 тауар бірлігін қамтитын бірінші партия келген кезде өндіруші 4000 тауар бірлігін шығарған. Импорттаушы кеден органынан нысанның құнын 1000 бірлікке, 4000 бірлікке немесе 10000 бірлікке бөлуді сұрай алады.
Тармақ 1. 8-баптың 1 (b) тармағының "iv" тармақшасында көрсетілген элементтер бөлігіндегі қосымша есепке жазулар объективті және саны тұрғысынан айқындауға болатын деректерге негізделуге тиіс. Импорттаушы үшін де, кеден органы үшін де ауыртпалықты барынша азайту мақсатында құнға қосуға жататын шаманы айқындау кезінде сатып алушының коммерциялық есептілік жүйесінде қамтылған деректер мүмкіндігінше пайдаланылуға тиіс.
Тармақ 2. Сатып алушы сатып алған немесе жалға алған, сатып алушы жеткізген элементтер үшін қосымша есепке жазулар сатып алу немесе жалға алу шығындарын құрайды. Қоғамдық иеліктегі элементтер үшін қосымша есепке жазулардың көшірмелерін алу шығындарын қоспағанда, қосымша есепке жазулар жүргізілмейді.
Тармақ 3. Қосымша есепке жазуға жататын құнды есептеудің жеңіл болу дәрежесі нақты компанияның құрылымына және оны басқару практикасына, сондай-ақ оның бухгалтерлік есепке алу әдістеріне байланысты болады.
Тармақ 4. Мысалы, бірнеше елден алуан түрлі тауарды импорттайтын фирма импорт елінен тысқары жерде орналасқан өзінің дизайнерлік орталығында есепке алу құжаттамасын осы тауарға қатысты шығыстар дәл көрсетілетіндей етіп жүргізуі мүмкін. Мұндай жағдайларда тиісінше 8-баптың ережелеріне сәйкес тікелей түзету жүргізілуі мүмкін.
Тармақ 5. Басқа жағдайды мысалға келтірейік, импорт елінен тысқары жерде орналасқан өзінің дизайнерлік орталығының шығыстарын фирма белгілі бір тауарлармен байланыстырмай, жалпы үстеме шығыстар ретінде есепке алуы мүмкін. Бұл жағдайда импортталатын тауарларға қатысты 8-баптың ережелеріне сәйкес дизайнерлік орталық бойынша барлық шығыстарды дизайнерлік орталық көрсететін қызметтер қолданылатын барлық өнімдерге бөлу және тауар бірлігінің құнына есептегенде импортқа осындай бөлінген шығыстарды қосу арқылы тиісті түзету жүргізілуі мүмкін.
Тармақ 6. Жоғарыда аталған жағдайлардың өзгеруі бөлудің қолайлы әдісін айқындаған кезде әртүрлі факторларды қарастыруды талап етеді.
Тармақ 7. Егер нақты элементтің өндірісі бірқатар елді және белгілі бір уақыт кезеңін қамтыса, түзету импорт елінен тысқары жерде осы элементке нақты қосылған құнмен шектелуге тиіс.
Тармақ 1. 8-баптың 1 (с) тармағында көрсетілген роялти мен лицензиялық төлемдер, басқалармен қатар, патенттер, сауда белгілері және авторлық құқықтар үшін төлемдерді қамтуы мүмкін. Алайда, кедендік құнды айқындаған кезде импортталатын тауарларды импорт елінде көшіру құқығы үшін төлемдер импортталатын тауарлар үшін нақты төленген немесе төленуге жататын бағаға қосылмайды.
Тармақ 2. Импортталатын тауарларды бөлу немесе қайта сату құқығы үшін сатып алушы жүргізген төлемдер, егер мұндай төлемдер импортталатын тауарларды әкелу еліне экспортқа сату шарты болып табылмаса, импортталатын тауарлар үшін нақты төленген немесе төленуге жататын бағаға қосылмайды.