Тармақ 1. Әрбір Тараптың құзыретті органы сұрау салуларды орындау кезінде алынған ақпарат пен құжаттардың қорғалуын және сақталуын қамтамасыз етеді. Ақпарат пен құжаттарға қол жеткізуді шектеу дәрежесін оларды берген Тараптың құзыретті органы айқындайды.
Тармақ 2. Бір Тарап екінші Тараптан алған ақпарат пен құжаттар оларды берген Тараптың алдын ала жазбаша келісімінсіз, үшінші Тарапқа беруге жатпайды.
Тармақ 3. Тараптардың алынған ақпараттың қорғалуын қамтамасыз ету бойынша міндеттемелері осы Келісімнің қолданысы тоқтатылғаннан не одан шыққаннан кейін де күшінде қалады.
Тармақ 4. Тараптар осы Келісімді іске асыру шеңберінде алмасу жүзеге асырылатын, мемлекеттік құпияны (мемлекеттік құпияларды) құрайтын мәліметтерді қамтитын ақпаратты 1993 жылғы 22 қаңтардағы Мемлекетаралық құпиялардың сақталуын өзара қамтамасыз ету туралы келісімде, 2013 жылғы 25 қазандағы Тәуелсіз Мемлекеттер Достастығы шеңберіндегі құпия ақпаратты қорғау туралы келісімде және осындай ақпаратты өзара қорғау туралы екіжақты халықаралық шарттарда көзделген тәртіппен қорғауды қамтамасыз етеді.