Егер Тарап қаржылық көрсетілетін қызметтерді берушілерді құруға және (немесе) олардың қызметіне қатысты лицензиялауды қолданса, онда мұндай Тарап:
- 1) Тараптың қызметті жүзеге асыруға лицензияларды беруге жауапты уәкілетті органдары атауларының жариялануын немесе жалпы жұрт назарына өзгеше түрде жеткізілуін;
- 2) лицензиялық рәсімдердің құруға немесе қызметке өздігінен шектеу болып табылмауын және қызметті жүзеге асыру құқығына тікелей байланысты лицензиялық талаптардың қызмет үшін өздігінен негізсіз кедергі болып табылмауын;
- 3) барлық лицензиялық рәсімдер мен талаптардың Тарап заңнамасында белгіленуін және лицензиялық рәсімдерді немесе талаптарды белгілейтін немесе қолданатын Тарап заңнамасының ол күшіне енген (қолданысқа енгізілген) күнге дейін жариялануын;
- 4) лицензия беруге арналған өтінішті ұсынуға және қарауға байланысты алынатын кез келген алымдардың құру мен қызмет үшін өздігінен шектеу болып табылмауын және Тараптың лицензиялаушы органының өтінішті қарауға және лицензия беруге байланысты шығындарына негізделуін;
- 5) Тарап заңнамасында лицензия беру (беруден бас тарту) туралы шешім қабылдауға белгіленген уақыт кезеңі өткеннен кейін және өтініш берушінің талабы бойынша Тараптың лицензияларды беруге жауапты тиісті уәкілетті органының өтініш берушіге оның өтінішінің қаралу жай-күйі туралы, сондай-ақ бұл өтініштің тиісінше толтырылған болып есептелетіні туралы хабар беруін қамтамасыз етеді. Кез келген жағдайда да өтініш берушіге өтінішке техникалық түзетулер енгізу мүмкіндігі беріледі. Тараптың тиісті заңнамасында көрсетілген барлық ақпарат пен құжаттар алынғанға дейін өтініш тиісті түрде толтырылған болып есептелмейді;
- 6) өтінішін қабылдаудан бас тартылған өтініш берушінің жазбаша талабы бойынша Тараптың лицензияларды беруге жауапты, өтінішті қабылдаудан бас тартқан уәкілетті органның өтініш берушіге мұндай бас тартудың себептері туралы жазбаша ақпарат беруін қамтамасыз етеді. Алайда, бұл ереже Тараптың лицензиялаушы органынан жария етілуі Тарап заңнамасының орындалуына кедергі келтіретін немесе қоғамдық мүдделерге немесе қауіпсіздіктің елеулі мүдделеріне өзгеше түрде қайшы келетін ақпаратты ашуды талап ететін ереже ретінде түсіндірілмеуге тиіс;
- 7) өтінішін қабылдаудан бас тартылған жағдайда, өтініш берушінің лицензия берілу үшін кез келген орын алған проблемаларды жоюға тырысатындай жаңа өтініш бере алуын;
- 8) берілетін лицензияның Тараптың бүкіл аумағында қолданылуын қамтамасыз етеді.