Бап 120 О банках и банковской деятельности в Республике Казахстан

Тармақ 1. Соттың банкті мәжбүрлеп тарату туралы шешімі заңды күшіне енген күннен бастап:

• 1) осы Заңның 84-бабы 1-тармағының 1), 2), 4), 5), 6), 7), 8) және 9) тармақшаларында көзделген салдар басталады;
• 2) банктің бұрын жұмыс істеп келген органдарының өкілеттіктері тоқтатылады, басшы қызметкерлері, ал қажет болған жағдайда өзге де қызметкерлері Қазақстан Республикасының еңбек заңнамасында белгіленген тәртіппен жұмыстан шығарылады.

Тармақ 2. Банктi мәжбүрлеп таратуға байланысты барлық шығыстар, осы Заңның 84-бабының 10-тармағында көзделген жағдайларды қоспағанда, осы банктiң қаражаты есебiнен ғана жүргiзiледi.

Тармақ 3. Тарату комиссиясы банктің мүлкiн бағалауды Қазақстан Республикасының бағалау қызметі туралы заңнамасына сәйкес жүргiзедi.

Тармақ 4. Банктің шетел валютасында көрсетілген міндеттемелері соттың банкті мәжбүрлеп тарату туралы шешімі заңды күшіне енген күнге Қазақстан Республикасының Ұлттық Банкі белгілеген ресми бағам бойынша теңгемен есепке алынады.

Тармақ 5. Аралық тарату балансын және мәжбүрлеп таратылатын банктiң кредиторлар талаптарының тiзiлiмiн уәкiлеттi орган бекiтедi.

Тармақ 6. Аралық тарату балансы бекітілгенге дейін қарсы біртекті талаптарды есепке алуды жүргізуге жол беріледі.

Тармақ 7. Банктің тарату комиссиясы мәжбүрлеп таратылатын банктің мүлкін өткізуді уәкілетті органның нормативтік құқықтық актілерінде айқындалған тәртіппен жүргізеді.

Тармақ 8. Уәкілетті орган банктiң тарату комиссиясының қызметiне бақылауды жүзеге асырады.

Тармақ 9. Тарату комиссиясы сотқа уәкiлеттi органмен келiсiлген тарату туралы есептi және тарату балансын ұсынады.

Тармақ 10. Тарату комиссиясы банк қызметінің тоқтатылуы тіркелгеннен кейін бес жұмыс күні ішінде уәкілетті органға банк қызметінің тоқтатылуы тіркелгені туралы бұйрықтың көшірмесін ұсынады.