Тармақ 1. Жыл сайын, республикалық бюджет бекітілерде Қазақстан Республикасының Үкіметі Қазақстан Республикасының Жоғарғы Кеңесіне Қор көлемінің және оны салалар мен объектілер бойынша пайдаланудың негізгі бағыттарының есеп-қисабын, сондай-ақ осы Қор қаражатының өткен жылғы жұмсалуы туралы есеп табыс етеді.
Тармақ 2. Қор қаражатын бөлген кезде оны қайтарудың мерзімдері мен кезеңдері белгіленеді. Қор қаражатын қайтару басталғанға дейінгі мерзім кредит беру аяқталғаннан кейінгі бес жылдан аспауға тиіс.
Тармақ 3. Қор қаражатын пайдаланғаны үшін нақты проценттік ставканы Үйлестіру кеңесі әрбір инвестициялық жоба мен бағдарлама бойынша жеке-жеке белгілейді.
Тармақ 4. Қор қаражаты кредитті ұзақ пайдалануға, бірақ инвестициялауға қабылданған жобалар мен бағдарламаларды жүзеге асыру мерзімін ескере отырып, он жылдан аспайтын мерзімге, сондай-ақ жеңілдікті кредит ставкасын белгілеумен, бірақ іске қосылған кәсіпорындар мен ұйымдар рентабельділігін ескере отырып, қолданылып жүрген коммерциялық ставкалардың елу процентінен аспайтын мөлшерде жеңілдікті негізде бөлінеді.
Тармақ 5. Үйлестіру кеңесінің шешімімен бекітілген инвестициялық кредит бөлу тізіміне кәсіпорындар мен ұйымдар меншік түрлеріне қарамастан әдетте конкурстық негізде, ірі жобалар мен бағдарламаларға міндетті түрде сараптама жасай отырып енгізіледі. Конкурсты өткізу тәртібі мен шарттары үйлестіру кеңесі бекіткен тиісті Ережеде белгіленеді.
Тармақ 6. Қор қаражатының жиырма проценттен аспайтын шамасы әлеуметтік қажеттерді шешу үшін қайтарылмайтын негізде пайдаланылуы мүмкін.