Қазақстан Республикасы кеден органдарына орындалуын бақылау жүктелген Қазақстан Республикасы заңдары мен Қазақстан Республикасының халықаралық шарттарының сақталуын қамтамасыз ету мақсатында, аталған заңдар мен шарттар сақталмайды не толық сақталмайды деп есептеуге негiздер болған жағдайда, Қазақстан Республикасының кедендерi мен жоғары тұрған кеден органдары өз құзыры шегiнде Қазақстан Республикасының кеден шекарасы арқылы тауарлар мен көлiк құралдарын өткiзушi тұлғалардың, кеден делдалдарының не бақылауы Қазақстан Республикасының кеден органдарына жүктелген қызметтi жүзеге асырушы өзге де тұлғалардың қаржы және сыртқы экономикалық қызметiн тексерудi тағайындауға не жүргiзуге құқылы. Қаржы және сыртқы экономикалық қызметiне тексеру жүргiзген кезде Қазақстан Республикасы кеден органдарының лауазымды адамдары кеден iсi мен Қазақстан Республикасы кеден органдарының қызметiне қатысты сыртқы экономикалық қызметтi жүзеге асыруға байланысты кез келген құжаттамалар (банк құжаттарын қоса) мен ақпараттың тегiн берiлуiн талап етуге және олармен танысуға, лауазымды адамдар мен басқа қызметкерлерден анықтамалар, жазбаша және ауызша түсiнiктемелер алуға, үй-жайларға сүргi салуға, Қазақстан Республикасының орталық кеден органы белгiлеген нысанда жасалған актi бойынша, егер олар басқа жерде тексерiлетiн болса, құжаттарды алуға құқылы. Алынған құжаттар Қазақстан Республикасының заңдарымен белгiленген мерзiмде қайтарылуға тиiс. Қажет болған жағдайда Қазақстан Республикасы кеден органдарының лауазымды адамдары құжаттамамен және ақпаратпен танысуға арналған орын мен уақытты белгiлей алады. Қазақстан Республикасы кеден органдары лауазымды адамдарының тексеру жүргiзу кезiндегi iс-әрекеттерi қаржы және сыртқы экономикалық қызметi тексерiлетiн тұлғаға заңсыз нұқсан келтiрмеуге тиiс. Тексеру қорытындылары бұл тұлғаға дереу хабарланады. Тексеру нәтижесiнде алынған барлық ақпарат жасырын болып табылады және оған осы Заңның 16-бабы ережелерiнiң күшi қолданылады.