Бап 24 ОБ АВТОРСКОМ ПРАВЕ И СМЕЖНЫХ ПРАВАХ

Тармақ 1. Компьютерлік бағдарламаның (бағдарламалық қамтылымның) немесе дерекқордың данасын заңды түрде иеленетiн адам автордың немесе өзге айрықша құқықтар иесiнiң рұқсатын алмай және қосымша сыйақы төлемей туындыны пайдалануға:

• 1) компьютерлік бағдарламаға (бағдарламалық қамтылымға) немесе дерекқорға оны пайдаланушының техникалық құралдарында жұмыс iстеу мақсатында ғана жүзеге асырылатын өзгерiстердi енгiзуге, Компьютерлік бағдарламаның (бағдарламалық қамтылымның) немесе дерекқордың жұмыс iстеуiне қажеттi оның мақсатына сәйкес кез-келген iс-әрекеттi, соның iшiнде ЭЕМ-нiң (бiр ЭЕМ немесе жүйенi бiр пайдаланушы) зердесiне жазу мен сақтауды, сондай-ақ автормен жасалған шартта өзгеше көзделмесе, көрiнеу қателердi түзетудi жүзеге асыруға;
• 2) Компьютерлік бағдарламаның (бағдарламалық қамтылымның) немесе дерекқордың көшiрмесiн тек қана архивтiк мақсатқа және Компьютерлік бағдарламаның (бағдарламалық қамтылымның) немесе дерекқордың түпнұсқасы жоғалып, жойылып кеткен немесе пайдалануға жарамай қалған жағдайларда заңды түрде алынған дананы ауыстыру үшiн ғана жасауға немесе жасауды тапсыруға құқылы. Бұл орайда компьютерлік бағдарламаның (бағдарламалық қамтылымның) және дерекқордың көшiрмесiн осы тармақтың 1)-тармақшасында көрсетiлгеннен басқа мақсаттарға пайдалануға болмайды және компьютерлік бағдарламаның (бағдарламалық қамтылымның) және дерекқордың данасын иелену заңды деп тану тоқтатылған жағдайда ол жойылуға тиiс.

Тармақ 2. Компьютерлік бағдарлама (бағдарламалық қамтылым) данасын заңды түрде иеленетiн адам автордың немесе өзге де айрықша құқықтар иесiнiң келiсiмiнсiз және қосымша сыйақы төлемей объект кодын көшiруге және бастапқы мәтiнде өзгертуге (компьютерлік бағдарламаны (бағдарламалық қамтылымды) қайта құрастыруға) немесе, егер олар осы адамның дербес әзірлеген компьютерлік бағдарламасының (бағдарламалық қамтылымының) қайта құрастырылған бағдарламамен өзара iс-әрекет жасай алатын өзге бағдарламалармен өзара iс-әрекет жасау қабiлетiне жету үшiн қажет болса, мынадай шарттарды сақтаған жағдайда ол бұл iс-әрекеттi жүзеге асыруды өзге адамдарға тапсыруға құқылы:

• 1) өзара iс-әрекет жасау қабiлетiне жету үшiн қажеттi, бұл адам бұрын басқа деректерден ала алмаған ақпарат;
• 2) аталған әрекеттер компьютерлік бағдарламаның (бағдарламалық қамтылымның) қайта құрастырылған, өзара iс-әрекет қабiлетiне жету үшiн қажеттi бөлiктерi жөнiнде ғана жүзеге асырылады;
• 3) қайта құрастыру нәтижесiнде алынған ақпаратты дербес әзірленген компьютерлік бағдарламаның (бағдарламалық қамтылымның) өзге бағдарламалармен өзара iс-әрекет жасау қабiлетiне қол жеткiзу үшiн ғана пайдалануға болады, дербес әзірленген компьютерлік бағдарламаның (бағдарламалық қамтылымның) басқа бағдарламалармен өзара iс-әрекет жасау қабiлетiне қол жеткiзу үшiн қажет болатын жағдайларды қоспағанда, оны өзге адамдарға беруге болмайды, сондай-ақ оны өзiнiң түрi жағынан қайта құрастырылатын компьютерлік бағдарламаға (бағдарламалық қамтылымға) едәуір ұқсайтын компьютерлік бағдарламаны (бағдарламалық қамтылымды) әзiрлеу үшiн немесе авторлық құқықты бұзатын басқа да кез-келген әрекеттi жүзеге асыру үшiн пайдалануға болмайды.

Тармақ 3. Бұл баптың ережелерiн қолдану компьютерлік бағдарламаны (бағдарламалық қамтылымды) немесе дерекқорды қалыпты пайдалануға орынсыз залал келтiрмеуге тиiс және автордың немесе компьютерлік бағдарламаға (бағдарламалық қамтылымға) немесе дерекқорға айрықша құқықтың өзге де иесiнiң заңды мүдделерiне негiзсiз қысым жасамауға тиiс.