Тармақ 1. Барлық кредиторлардың мүдделерін қамтамасыз ету мақсатында кредиторлар жиналысы шақырылады. 2. Кредиторлар жиналысына қатысу құқығы кредиторлар талаптарының тізіліміне енгізілген кредиторларға (олардың өкілдеріне), борышкер мүлкінің меншік иесіне (ол уәкілеттілік берген органға), құрылтайшыларға (қатысушыларға), уәкілетті органға тиесілі. 3. Кредиторлар жиналысын ұйымдастыру, өткізу және оның шешімдер қабылдауы осы Заңның 14-3-бабының 6–11-тармақтарында белгіленген тәртіппен жүргізіледі. 4. Кредиторлар жиналысының хаттамасы екі данада жасалады, оның бірі оңалту рәсімін қолдану туралы шешім қабылдаған сотқа, екіншісі кредиторлар комитетіне беріледі. Кредиторлар жиналысының хаттамасына: 1) кредиторлар жиналысын өткізу күніндегі кредиторлар талаптары тізілімінің; 2) жиналысқа қатысушылар өкілдерінің өкілеттіктерін растайтын құжаттардың; 3) жиналысқа қатысушыларға танысу және (немесе) бекіту үшін ұсынылған материалдардың; 4) кредиторлар жиналысын өткізу күні мен орны туралы кредиторларды тиісті түрде хабардар еткені туралы айғақтайтын дәлелдемелер болып табылатын құжаттардың; 5) борышкердің қалауы бойынша өзге де құжаттардың көшірмелері қоса берілуге тиіс. 5. Кредиторлар жиналысының айрықша құзыретіне: 1) борышкер мүлкінің меншік иесінде (ол уәкілеттік берген органда), құрылтайшыларда (қатысушыларда) оңалту жоспарын бекіткен сәттен бастап борышкер мүлкін және істерін басқару құқығын сақтау немесе оның күшін жою туралы шешім қабылдау; 2) кредиторлар комитеті құрамының санын айқындау, құрамын қалыптастыру және бекіту; 3) кредиторлар комитетінің құрамына өзгерістер енгізу; 4) оңалту жоспарын келісу; 5) оңалту жоспарына өзгерістер мен толықтыруларды келісу; 6) оңалту рәсімін ұзартуды келісу; 7) кредиторлар комитеті мүшелерінің оңалту рәсімін жүзеге асыру барысы туралы ақпаратты кредиторлар назарына жеткізуінің тәртібі мен мерзімін айқындау; 8) өзге мәмілелерді кәдімгі коммерциялық операциялар шеңберінен тыс жасалатындардың санатына жатқызу; 9) оңалту жоспарында көзделмеген, кәдімгі коммерциялық операциялар шеңберінен тыс мәмілелерді келісу; 10) борышкердің өндiрiп алынуы мүмкiн емес дебиторлық берешегiнiң сомасын бекiту; 11) оңалтушы басқарушының кандидатурасын таңдау; 12) оңалтушы басқарушының негізгі сыйақы сомасын және оны төлеу тәртібін айқындау; 13) борышкер мүлкін және істерін басқару құқығы борышкер мүлкінің меншік иесінде (ол уәкілеттік берген органда), құрылтайшыларда (қатысушыларда) сақталған жағдайда, борышкерді басқару органдары мүшелерінің ақшалай сыйақысының сомасын анықтау; 14) оңалтушы басқарушының (борышкердің) қорытынды есебін келісу; 15) осы Заңда көзделген өзге де өкілеттіктер жатады. 6. Кредиторлар жиналысының құзыретіне кіретін, осы баптың 5-тармағының 1), 4), 5), 6) және 11) тармақшаларында көзделген мәселелер бойынша шешімдер қабылдау кезінде сырттай дауыс беруге жол берілмейді. № 564-IV