Тармақ 1. Егер Уағдаласушы Мемлекеттiң резидентi басқа Уағдаласушы Мемлекетте орналасқан тұрақты мекеме арқылы онда кәсiпкерлiк қызметпен айналыспайтын болса ғана резиденттiң кәсiпкерлiк қызметтен тапқан пайдасына осы Мемлекетте ғана салық салынады. Егер резидент жоғарыда айтылғанындай кәсiпкерлiк қызметпен айналысып жүрсе немесе айналысқан болса, резиденттiң кәсiпкерлiк қызметтен тапқан пайдасына басқа Мемлекетте салық салынуы, бiрақ оның: а) осындай тұрақты мекемеге; б) осы басқа Мемлекетте осы тұрақты мекеме арқылы сатылатын тауарларға немесе бұйымдарға сәйкес келетiн тауарлар мен бұйымдарды сатуға; немесе в) осы басқа Мемлекетте тұрақты мекеме арқылы жүзеге асырылатын қызметке сәйкес келетiн басқа кәсiпкерлiк қызметке қатысты бөлiгiне ғана салық салынуы мүмкiн. 2. 3-тармақтың ережелерiн ескере отырып, егер Уағдаласушы Мемлекеттiң резидентi басқа Уағдаласушы Мемлекетте кәсiпкерлiк қызметпен сонда орналасқан тұрақты мекеме арқылы айналысса немесе айналысқан болса, онда ол осындай немесе осыған ұқсас жағдайда нақ осындай немесе осыған ұқсас қызметпен айналысатын дербес және жеке тұлға болғанда және резидентпен немесе кез-келген басқа тұлғалармен арадағы өзiнiң қатынастарында мүлдем тәуелсiз түрде iс-әрекет жасағанда кәсiпкерлiк қызметтен алуы мүмкiн пайдасы әрбiр Уағдаласушы Мемлекеттегi осы тұрақты мекемеге жатады. 3. Тұрақты мекеменiң кәсiпкерлiк қызметтен алатын пайдасын айқындау кезiнде тұрақты мекеменiң мақсаттары үшiн жұмсалған шығындарды, соның iшiнде тұрақты мекеме орналасқан Мемлекетте немесе басқа жерде жұмсалды ма, жоқ па - осыған қарамастан жұмсалған басқару шығындары мен жалпы әкiмшiлiк шығындарды шегерiп тастауға болады. Тұрақты мекемеге патенттердi немесе басқа құқықтарды пайдаланғаны үшiн роялти, қаламақылар немесе осыған ұқсас төлемдер түрiнде, көрсеткен нақты қызметтерi үшiн немесе менеджмент үшiн комиссиялық төлемдер түрiнде, немесе тұрақты мекемеге берiлген қарыз үшiн проценттер түрiнде компанияның бас офисiне немесе басқа офисiне төленген сомаларды (нақты шығындарды өтеуге арналған сомадан басқа) шегерiп тастауға рұқсат етiлмейдi. 4. Бiр жақтың кәсiпкерлiк қызметтен тапқан пайдасы тұрақты мекеменiң сол жақ үшiн тауарлар немесе бұйымдар сатып алғаны үшiн ғана осы тұрақты мекемеге есептелмейдi. 5. Егер Уағдаласушы Мемлекеттердiң бiрiнiң құзырлы органының қолында бар немесе ол оңай ала алатын ақпарат тұрақты мекеменiң кәсiпкерлiк қызметтен тапқан пайдасын яки шығындарын айқындау үшiн жеткiлiктi болмаса, пайда осы Мемлекеттiң салық заңдарына сәйкес есептелуi мүмкiн. Осы 5-тармақтың мақсаттары үшiн, егер салық төлеушi ақпаратты оны сұратқан құзырлы органға осындай ақпаратты құзырлы орган жазбаша сұратқан күннен бастап 91 күн iшiнде берсе, онда осындай ақпарат оңай алынған ақпарат болып қарастырылады. 6. Егер кәсiпкерлiк қызметтен алынған пайда осы Конвенцияның басқа баптарында бөлек айтылған табыс түрлерiн қамтыса, онда бұл баптардың ережелерi осы баптың ережелерiн қозғамайды. 7. Алдыңғы тармақтардың мақсаттары үшiн тұрақты мекемеге қатысты кәсiпкерлiк қызметтен алынған пайда, егер мұндай тәртiптi өзгерту үшiн жеткiлiктi және дәлелдi себептер болмаса, жылма-жыл бiрдей тәсiлмен айқындалады.