Тармақ 1. Тiкелей инвестицияларды мемлекеттiк қолдаудың мақсаты экономиканың басым секторларында тауарлар өндiрудi, жұмыс атқару мен қызмет көрсетудi, жеделдете дамытуды қамтамасыз ету үшiн қолайлы инвестициялық ахуал жасау болып табылады. 2. Мақсатқа жету процесiнде Қазақстан Республикасы мынадай мiндеттердi шешедi: 1) жаңа технологияларды, озық техника мен "ноу-хауды" енгiзу; 2) iшкi рынокты жоғары сапалы тауарлармен және көрсетiлетін қызметтермен молықтыру; 3) отандық тауар өндiрушiлердi мемлекеттiк қолдау және ынталандыру; 4) экспортқа бағдарланған және импортты алмастыратын өндiрiстердi дамыту; 5) Қазақстан Республикасының шикiзат ресурстарын ұтымды да кешендi пайдалану; 6) менеджмент пен маркетингтiң осы заманғы әдiстерiн енгiзу; 7) жаңа жұмыс орындарын құру; 8) жергiлiктi кадрларды оқытып-үйретудiң үздiксiз жүйесiн енгiзу, олардың бiлiктiлiк деңгейiн арттыру; 9) өндiрiстiң қарқындылығын қамтамасыз ету; 10) қоршаған табиғи ортаны жақсарту.