Тармақ 1. Егер өкiлiн жiберген мемлекеттiң кемесi консулдық орналасқан мемлекеттiң аумақтық немесе iшкi суларында күйресе, жарақат алса, қайраңдап қалса, жағаға шығып қалса немесе қандай да бiр басқа апатқа ұшыраса, консулдық орналасқан мемлекеттiң құзыреттi өкiмет орындары бұл туралы және кеменi, жолаушыларды, экипажды, сондай-ақ олардың дүние-мүлiктерi мен жүктерiн құтқару және қорғау жөнiнде қолданылған шаралар туралы консулдық қызмет адамына дереу хабарлайды.
Тармақ 2. Консулдық орналасқан мемлекеттiң құзыреттi өкiмет орындары осы баптың 1-тармағына сәйкес консулдық қызмет адамына ол қолданып жатқан шаралар жөнiнде оның өтiнiшi бойынша қажеттi көмек көрсетедi.
Тармақ 3. Егер күйреуге ұшыраған кеме, оның экипажының құжаттары, заттары мен жүктерi консулдық орналасқан мемлекеттiң жағалауында немесе осы жағалауға жақын жерде табылса, немесе осы мемлекеттiң портында болса, егер кеме капитаны, оның көмекшiсi, кеменiң иесi және сақтандыру компанияларының өкiлдерi бұл кезде болмаса және аталған меншiктiң сақталуын қамтамасыз ету немесе оның бұдан әрi жеткiзiлетiн жерiн анықтау жөнiнде шара қолдана алмаса, консулдық қызмет адамы кеме иесінiң апат кезiнде болуына тура келгенде қолдануы мүмкiн шараларын қолдануға қақылы.
Тармақ 4. Консулдық қызмет адамы күйреген, апатқа ұшыраған немесе қайраңға отырып қалған кеменiң қай ұлттық екендiгiне қарамастан кеменiң кез келген дүние-мүлкi және өкiлiн жiберген мемлекеттiң азаматына тиесiлi жүк жөнiнде, егер осы дүние-мүлiк консулдық орналасқан мемлекеттiң жағалауында, жағалауға жақын жерде табылса немесе осы мемлекеттiң портында болса, аталған баптың 3-тармағында көзделген барлық шараларды қолдана алады. Консулдық орналасқан мемлекеттiң құзыреттi өкiмет орындары мұндай дүние-мүлiктiң бар екендiгi туралы консулдық қызмет адамын дереу хабардар етуге тиiс.
Тармақ 5. Апатқа ұшыраған кеменiң жабдықтары, жүктерi және азық-түлiк қорлары консулдық орналасқан мемлекетте пайдалануға немесе тұтынуға арналмаса, консулдық орналасқан мемлекетте оларға кедендiк баж салықтары мен алымдар салынбайды.