Бап 20 Об адвокатской деятельности. Адвокаттар алқасы

Тармақ 1. Адвокаттар алқасын адвокаттық қызметпен айналысуға құқығы бар адамдар құрады.

Тармақ 2. Адвокаттар алқасы жеке және заңды тұлғаларға бiлiктi заң көмегiн көрсету үшiн, адвокаттардың құқықтары мен заңды мүдделерiн бiлдiру және қорғау үшiн, осы Заңда белгiленген өзге де мiндеттердi орындау үшiн құрылатын адвокаттардың коммерциялық емес, кәсiби, өзiн-өзi басқаратын және өзiн-өзi қаржыландыратын ұйымы болып табылады.

Тармақ 3. Облыстың, республикалық маңызы бар қаланың, астананың аумағында адвокаттардың бiр ғана алқасы құрылып, жұмыс iстеуге тиіс, ол басқа облыстың, республикалық маңызы бар қаланың, астананың аумағында өзінің құрылымдық бөлімшелерін (филиалдары мен өкілдіктерін) құруға құқылы емес.

Тармақ 4. Адвокаттар алқасының негiзгi мiндеттерi:

• 1) адвокаттық қызметтi жүзеге асыру кезiнде алқа мүшелерiне жәрдемдесу, кәсiби көмек көрсету және оларды қорғау;
• 2) алқа мүшелерiнiң қызметiн материалдық-техникалық және анықтамалық-ақпараттық қамтамасыз ету;
• 3) адвокаттық қызметтi жүзеге асыруға кәсiптiк бақылауды ұйымдастыру;
• 4) алдын ала тергеу және сот органдарының белгiлеуi бойынша тегiн заң көмегiн көрсету (осы Заңның 6-бабы ) мен қорғауды ұйымдастыру болып табылады.

Тармақ 5. Адвокаттар алқасы заң консультацияларын құрады.

Тармақ 6. Адвокаттар алқалары Республикалық адвокаттар алқасына бірігеді.