Монополияға қарсы орган жүзеге асыратын тексеру жоспарлы және жоспардан тыс болып бөлiнуi мүмкiн. Жоспарлы тексерулер тексерiлетiн субъектiлердiң Қазақстан Республикасының жосықсыз бәсеке туралы заңнамасын сақтауына байланысты мәселелердiң барлық кешенiн қамтиды және жылына бiр реттен жиi жүргiзiлмейдi. Жоспарлы тексерулер тексерiлетiн субъектiнiң орналасқан жерi бойынша немесе оның құрылымдық бөлiмшесiнiң орналасқан жерi бойынша жүргiзiлуi мүмкiн. Монополияға қарсы органның басшысы жыл сайын бекiтетiн органның жұмыс жоспары жоспарлы тексеру жүргiзуге негiз болып табылады. Жоспарда тексеру жүргiзiлуi мүмкiн субъектiлердiң тiзбесi және тексеру жүргізiлетiн кезең қамтылуға тиiс. Жоспардан тыс тексеру - монополияға қарсы органның жоспарында көзделмеген тексеру және Қазақстан Республикасының жосықсыз бәсеке туралы заңнамасының бұзылуы туралы монополияға қарсы органға келiп түскен не жеке анықталған ақпаратты растау үшiн жүргiзiледi.